Mereke kúnderi Býrabaıǵa 40 myńǵa jýyq adam barǵan

ASTANA. KAZINFORM — Bul ótken jylmen salystyrǵanda eki ese kóp, dep habarlaıdy Kazinform tilshisi.

«Býrabaı Damý» JShS baspasóz qyzmetiniń habarlaýynsha, Naýryz meıramynda shıpajaıǵa 40 myńǵa jýyq qonaq, 11 910 avtokólik kelgen.

— Eń tanymal oryndar dástúr boıynsha Abylaı han saıabaǵy, Vızıtorlar ortalyǵyndaǵy shıpajaıdyń haıýanattar baǵy, mýltımedııalyq ınteraktıvti keshen jáne maral ósirý fermasy bolyp qala beredi, — dep atap ótti shıpajaıdyń baspasóz qyzmeti.

Naýryz meıramynyń ózi demalys ornynda úsh jerde toılandy. 21 naýryz kúni qonaqtarǵa «Býrabaı» shıpajaıynyń Vızıt ortalyǵynda ulttyq taǵamdar usynyldy. Ulttyq oıyndar oınatylyp, kontsert qoıyldy.

Taǵy bir merekelik alań — Santa rezıdentsııasy boldy, onda táttiler de usynyldy.

Al 22 naýryz kúni Býrabaı aýylynyń ortalyq alańynda Naýryz meıramyn toılaý sharasy ótti.

2024 jyly ulttyq saıabaqqa barlyǵy mıllıonnan astam týrıst kelgen.

Aıta keteıik, osyǵan deıin Býrabaıda Ulttyq Quryltaıdyń 4-shi otyrysy ótken bolatyn.