Mereke qarsańynda Jambyl oblysyndaǵy mekemelerdiń órt qaýipsizdigi tekserildi
TARAZ. QazAqparat - Jambyl oblystyq tótenshe jaǵdaılar departamentiniń ókilderi aldaǵy mereke kúnderi qaýipsizdikti qamtamasyz etý boıynsha jańa jyl aldyndaǵy túsindirý jumystaryn júrgizip jatyr, dep habarlaıdy «QazAqparat» HAA tilshisi.
«Pırotehnıkalyq ónimderdi teksermeı satý jáne ony órt qaýipsizdigi sharalaryn saqtamaı qoldaný - jańa jyl túninde kóptegen órtterdiń shyǵýyna, adamdardyń, sonyń ishinde balalar men jasóspirimderdiń jaraqat alýyna, tipti mert bolýyna ákep soqtyrady, - dedi Jambyl oblystyq tótenshe jaǵdaılar departamentiniń basshysy Maqsat Ákimbaev. - Pırotehnıkalyq zattardyń óte qaýipti ekeni belgili. Sondaı-aq, jergilikti atqarý organdarmen birlesip jańa jyldyq is-sharalardy ótkizý kezinde jumyldyrylatyn nysandar tizimin jasadyq».
TJD deregi boıynsha, barlyǵy oblysta 793 nysan esepke alynǵan. Onyń ishindegi 657 nysan bilim berý salasyna, 32-i - densaýlyq saqtaý salasyna tıesili bolsa, 27-i - túrli saraılar men mádenıet úıleri, beseýi - sport mekemesi, 56-sy - oıyn-saýyq ortalyqtary. TJ qutqarýshylary eki qarttar úıin, úsh múmkindigi shekteýli jandardyń ınternatyn, balalar úıi men jeti jańa jyldyq kesh ótetin meıramhanany baqylaýǵa alatyn bolady.
«Departament Taraz qalalyq tótenshe jaǵdaılar basqarmasy men aýdandyq TJ bólimderine udaıy baqylaýda ustaý jáne nysandardyń órt qaýipsizdigi jaǵdaıyn tekserý týraly tapsyrmalar berdi. Budan bólek, oblysta 260 jıyn, 5 480 adamnyń qatysýymen turǵyndar arasynda nusqaýlar ótkizilip, órt qaýipsizdigi erejeleri talaptaryn oryndaý men pırotehnıkalyq zattardy qoldanýǵa jol bermeý týraly eskertpeler taratyldy», - dep atap ótti spıker.
Jambyl oblystyq TJD men ІІD birlesken is-sharalarynyń jospary boıynsha jergilikti polıtsııa qyzmetkerleri kún saıyn bazarlar men basqa da saýda oryndarynda pırotehnıkalardy zańsyz satýǵa jol bermeý úshin reıdter júrgizedi.
«Mereke kezinde táýlik boıy úzdiksiz kezekshilik etetin jedel toptar quryldy. Al, mereke ótetin jerlerde ınjenerlik-ıspektorlyq quram men órt sóndirý toby kezekshilik etedi», - dedi Maqsat Ákimbaev.
