Mereke qarsańynda bir top kókshetaýlyq baspanaly boldy
KÓKShETAÝ. QazAqparat- Konstıtýtsııa kúnine oraı Kókshetaýda Turǵyn úı qurylys jınaq bankiniń salymshylary jańa páterdiń kiltine ıe boldy, dep habarlaıdy QazAqparat tilshisi.
Qopa kóliniń jaǵalaýy aýmaǵynda ornalasqan 9 qabatty turǵyn úı kesheni Turǵyn úı qurylys jınaq bankiniń salymshylary úshin salynǵan. Qurylys jumystaryn «K.G.S. Saýda» JShS seriktestigi júrgizdi.
Jańa turǵyn úıdiń páter kiltin tapsyrý rásimine aımaq basshysy Málik Myrzalın qatysyp, shańyraq ıelerin qýanyshtarymen quttyqtady.
«Memleket basshysy Nursultan Nazarbaevtyń Joldaýynda halyqty baspanamen qamtamasyz etý máselesi basty oryn alady. Búgin sol mindetter júzege asyrylyp, úı kezeginde turǵan halyqtyń baspanaǵa qol jetkizýi - zor qýanysh. Osy baǵyttaǵy jumystardy odan ári jalǵastyra beremiz. Búgingi mereke kúni qarsańyndaǵy qýanyshtaryńyz uzaǵynan súıindirsin», - deı kele, aımaq basshysy qýanysh ıelerine jańa páterdiń kiltin tabys etti.
Osy oraıda, jańa úıden úsh bólmeli páter alǵandardyń biri - Dýlat Janmuhanbetov pen Orazbaı Ospanovtardyń otbasy. Aımaq basshysy jańa páter ıleriniń shańyraǵynda bolyp, syılyqtaryn tartý etti.
«Men búgin baspanaly bolǵanyma sheksiz qýanyshtymyn. Endi osy úıde otbasymmen baqytty ǵumyr keshemiz degen oıdamyz. Jalpy, búgingi páterdiń baǵasy sharyqtaǵan zamanda Elbasynyń bastamasymen qolǵa alynǵan memlekettik baǵdarlamalardyń kómegi zor», dep qýanyshymen bólisti Dýlat Janmuhanbetov.
