Merdigerdi shaqyramyz – Arystyń ákimi jarylystan soń salynǵan sapasyz úıler jaıly

NUR-SULTAN. QazAqparat – Arys qalasynyń ákimi Murat Qadyrbek jarylystan keıin salynǵan úılerdiń sapasyna shaǵymdardyń túsip jatqanyn rastady, dep habarlaıdy QazAqparat tilshisi.

Arystaǵy jarylystan soń salynǵan úılerdiń sapasyz ekeni jaıly shaǵymdar túsýde. Byltyr ǵana kúrdeli jóndeýden ótken úılerdiń keı jerin turǵyndardyń ózi jóndedik dep otyr. «Bul jaıly ne aıta alasyz?» degen suraq qoıyldy Arys qalasynyń ákimi Murat Qadyrbekke OKQ-daǵy baspasóz máslıhatynda.

Arystyń ákimi shynynda da mundaı suraqtardyń týyndap jatqanyn rastady.

«Qala boıynsha 7635 turǵyn úıge jóndeý jumystary júrgizilgen. Sondyqtan ishinde biren-saran ondaı jaǵdaılar tirkelýi múmkin. Bul zań sheńberinde sheshiletin másele. Eger turǵyn úıge jóndeý jumystarynan keıin belgili bir aqaýlar shyqqan jaǵdaıda shartta kórsetilgendeı merdigerdi shaqyryp, úıdi jóndep beremiz. Jalpy mundaı shaǵymdar jyl basynan beri biren-saran túsýde. Ol boıynsha tıisti sharalardy qabyldadyq. Merdigerler ózine mindetteme alǵan. Jóndeý jumystary júrgizilip jatyr», - dedi ol.

Eske sala ketsek buǵan deıin Arys qalasynyń ákimi jarylystan keıin zaqym kelgen 7635 úıdiń kóbi jóndelip, keıbiri qaıta salynyp halyqtyń ıgiligine berilgenin málim etken edi.