Mercedes, Toyota, Hyundai: «Samuryq-Qazyna» basshylary qandaı kólik minip júr
ASTANA. KAZINFORM – «Samuryq-Qazyna» aktsıonerlik qoǵamy basshylardy kólikpen qamtamasyz etýge jylyna 100 mln teńge jumsaıdy. Korporatsııanyń Áleýmettik saıasat, korporatıvtik basqarý jáne ákimshilik qamtamasyz etý departamenti Kazinform saýalyna osyndaı málimetpen jaýap berdi.
Másele qaıdan shyqty?
Búgin «Samuryq-Qazyna» aktsıonerlik qoǵamynyń satyp alý saıasatyna jaýapty basshylary baspasóz máslıhatyn ótkizip, Eýropa qaıta qurý jáne damý bankiniń standartyna negizdelgen satyp alý júıesi otandyq óndirýshilerdi qalaı qoldap jatqany týraly málimet usynǵan.
Kazinform tilshisi qarapaıym qazaqstandyqtar ýtılalym, kólikti alǵashqy tirkeý, kedendik rásimdeý tólemderin tóleý arqyly otandyq avtoóndiriske qoldaý kórsetip otyrǵanyn eskerip, qordyń bul baǵytta qandaı saıasat ustanatynyn surady.
Naqty aıtsaq: «Samuryq-Qazyna» qorynyń menshiginde neshe qyzmettik kólik bar? Onyń neshe paıyzy Qazaqstanda qurastyrylǵan?» - degen suraqtar qoıyldy. Qordyń satyp alý saıasatyna jaýapty basshylardyń eshbiri bul suraqqa sol sátte jaýap bere almaı, keıin jazbasha málimet usynýǵa ýáde berdi.
6 kólik jaldaýǵa jylyna 100 mln teńge
Jaýapta aıtylǵan aqparatqa sensek, qor COVID-19 pandemııasy kezindegi únemdeý sharalarynan keıin qyzmettik kólikten túgel bas tartqan. Onyń ornyna kólikti syrttan jalǵa alyp paıdalanady.
- Qor jalǵa alyp otyrǵan avtokólikterdiń ortasha «jasy» – 5–6 jyl. 2024 jyly júrgizýshileri bar 6 avtokólikti jalǵa alý úshin qor 98,5 mln teńge (qosylǵan qun salyǵyn qosa alǵanda) jumsady. 2025 jyly júrgizýshileri bar 6 avtokólikti jalǵa alýǵa 105 mln teńge (QQS qosa alǵanda) jumsaý josparlanyp otyr, - dep jazylǵan málimette.
Jaýaptaǵy málimet boıynsha jalǵa alynyp otyrǵan 6 kóliktiń bireýin – Qordyń basqarma tóraǵasy (Nurlan Jaqypov – red.), ekeýin – Qordyń táýelsiz dırektorlary minedi. Aıta ketý kerek, qordyń resmı saıtyndaǵy málimette táýelsiz dırektorlardyń sany tórteý - Vong Hen Faın, Jámishev Bolat Bıdahmetuly, Sýtera Lýka, Muhammed Jámıl ál Ramahı.
- Qalǵan 3 kólik – kezekshi kólik retinde sharýashylyq qyzmet kórsetýge arnalǵan, - dep jazady Qor departamentiniń mamandary.
Resmı jaýapta jalǵa alynyp otyrǵan kóliktiń markalary da kórsetilgen. Alaıda qaı basshy sonyń qaısysyn tizgindeıtini naqtylanbaǵan. Olar:
- Mercedes-Benz
- Toyota Camry
- Hyundai Sonata (Qazaqstanda qurastyrylǵan)
Eske salsaq, 2024 jylǵy bıýdjettiń atqarylýyn talqylaýǵa arnalǵan otyrysta Májilis depýtaty Ádil Jubanov «Samuryq-Qazyna» aktsıonerlik qoǵamy taýarlar men qyzmetterdiń 60 paıyzyn bir kózden satyp alǵanyn keltirip, Qordy taratyp jiberýdi usynǵan bolatyn.