Mercedes nelikten áskerı tehnıka shyǵarýdy qolǵa alǵaly otyr
ASTANA. KAZINFORM – Germanııanyń Mercedes-Benz avtokontserni qarý-jaraq óndirisi naryǵyna shyǵý múmkindigin qarastyryp jatyr, dep habarlaıdy Deutsche Welle.
Kompanııa basshysy Ola Kallenıýs eger mundaı baǵyt ekonomıkalyq turǵydan tıimdi bolsa, kontsern Eýropanyń qorǵanys áleýetin nyǵaıtýǵa qatysýǵa daıyn ekenin málimdedi.
The Wall Street Journal basylymyna bergen suhbatynda Kallenıýs álemniń barǵan saıyn boljap bolmaıtyn sıpat alyp bara jatqanyn, al Eýropa elderine óz qaýipsizdigin kúsheıtý qajet ekenin aıtty.
– Eýropa óziniń qorǵanys áleýetin kúsheıtýi kerek. Eger biz bul úderiste oń ról atqara alsaq, soǵan daıyn bolamyz, – dedi Mercedes-Benz Group basshysy.
Sonymen qatar ol áskerı ónim naryǵyna shyqqan kúnniń ózinde kompanııa bıznesiniń negizgi baǵyty avtomobıl óndirisi bolyp qala beretinin naqtylady. Qorǵanys segmenti kontsern qurylymynda tek shaǵyn úleske ıe bolýy múmkin, alaıda bolashaqta perspektıvaly nıshaǵa aınalýy yqtımal.
Buǵan deıin Financial Times Volkswagen ızraıldik Rafael Advanced Defense Systems kompanııasymen yqtımal yntymaqtastyq máselesin talqylap jatqanyn habarlaǵan edi. Basylym málimetinshe, Osnabrıýktegi Volkswagen zaýytyn «Temir kúmbez» zymyranǵa qarsy qorǵanys júıesiniń komponentterin shyǵarýǵa beıimdeý nusqasy qarastyrylyp jatyr.
Kontsernniń ózinde ázirge qarý-jaraq óndirisi kompanııa josparyna kirmeıtini aıtyldy. Degenmen VW 2027 jyly avtomobıl shyǵarýdy toqtatqannan keıin kásiporyndy paıdalanýdyń jańa stsenarıılerin izdeýdi jalǵastyryp otyr.
Eske sala ketsek, buǵan deıin BMW basshysy kompanııadaǵy 35 jyldyq qyzmetinen keıin otstavkaǵa ketkeni habarlandy.
