Mercedes Germanııadaǵy zaýyttaryn jabýy múmkin: ınvestıtsııa salýdy toqtatty
ASTANA. KAZINFORM — Mercedes-Benz Germanııadaǵy kásiporyndaryna ınvestıtsııa salýdy toqtatyp, eldegi keıbir zaýyttaryn jabý máselesin qarastyryp jatyr. Buǵan kontsern ishindegi shyǵyndardy qysqartý jónindegi kelissózderdiń nátıjesiz aıaqtalýy sebep bolǵan. Bul týraly DW Die Welt Handelsblatt basylymyna silteme jasap habarlady.
Mercedes kompanııasynyń óndiris jónindegi dırektory Mıhael Shıbe shyǵyndardy azaıtý máselesi boıynsha áli ortaq sheshimge kele almaǵandaryn aıtty.
— Qarqyndy ári birneshe ret júrgizilgen talqylaýlarǵa qaramastan, ázirge ońtaıly sheshim taba almadyq. Qazirgi shyǵyn deńgeıimen Germanııaǵa ınvestıtsııa sala almaımyz. Sondyqtan dırektorlar keńesi Germanııadaǵy kásiporyndarǵa barlyq jańa ınvestıtsııany toqtatý týraly birlesken sheshim qabyldady, – dedi ol.
Shıbeniń aıtýynsha, eger Germanııadaǵy óndiris shyǵyndarynyń qurylymyn ózgertý múmkin bolmasa, Mercedes kompanııasynyń eldegi kem degende birqatar kásiporny jabylýy yqtımal. Al keıingi modelderdiń óndirisi tolyǵymen shetelge kóshirilýi múmkin.
Óz kezeginde Mercedes kompanııasynyń eńbek qatynastary jónindegi dırektory Brıtta Zeger zaýyttardyń jabylýyna jol bermeýge bar kúshterin salatynyn atap ótti. Degenmen, onyń aıtýynsha, qazir mundaı stsenarııdi naqty qarastyrýǵa týra kelip otyr.
Qazan aıynyń sońynda Mercedes shyǵyndardy azaıtý baǵdarlamasy aıasynda Germanııadaǵy jumys oryndaryn qosymsha qysqartýdy josparlap otyrǵanyn málimdegen edi. Keıin kompanııa 2026 jylǵa arnalǵan tabys boljamyn da tómendetti.
Kompanııanyń sońǵy derekterine sáıkes, úshinshi toqsandaǵy satylym rentabeldiligi 2,5 paıyzǵa deıin tómendegen. Al byltyrǵy jyldyń sáıkes kezeńinde bul kórsetkish 4,8 paıyz bolǵan.
Kontsern qarjylyq kórsetkishterdiń nasharlaýyna Qytaıdaǵy bıznesiniń quldyraýyn, jańa ónimderdi ázirleýge jumsalatyn shyǵyndardy sebep retinde atady. Atap aıtqanda, Qytaı naryǵyndaǵy Mercedes satylymy bir toqsannyń ishinde shamamen úshten birge qysqarǵan.
