Mercedes Benz óndiristegi robottar jumysyn adamdarǵa júktemek
ASTANA. QazAqparat - Kólik shyǵarýshy Mercedes Benz úlken ónerkásiptik robottardy adamdarmen almastyrmaq. Olarǵa shaǵyn avtomattandyrylǵan qurylǵylar kómektesedi. Osylaısha kompanııa óndiris jumysyn ońtaılandyryp, avtomobıl jasaý ýaqytyn qysqartpaq. Bul týraly Bloomberg agenttigine kompanııa óndirisiniń basshysy Markýs Shefer málimdegen.
Robottar qarapaıym operatsııalardy oryndaǵanymen avtomobılderdiń syrtqy shanaǵyn jabdyqtaýǵa qabiletsiz. «Robottar qazirgi óndirisimizdegi tapsyrys berýshiniń ótinishine oraı ártúrli jumysty atqarýǵa shamalary jetpeı jatyr», - dedi Shefer. Óıtkeni shanaqty ár joly tapsyrys berýshiniń yńǵaıyna saı jasaý qol eńbegin talap etedi.
Sheferdiń aıtýynsha, kompanııa bir mashınany qurastyrýdy 61-den 30 saǵatqa deıin azaıtýdy kózdep otyr. Alaıda kóliktiń modelder men jańǵyrtylǵan túrleri kóbeıýde, ol úshin barlyq óndiristik jelini qaıta jabdyqtaý kerek, oǵan birneshe kún qajet. Al, dánekerleý robottaryn qaıta baǵdarlamalaý bir aptaǵa sozylady, osy kezde óndiris toqtap qalady.
Mercedes Benz aldaǵy ýaqytta osy kemshilikti boldyrmaý úshin sharýany adamdarǵa júkteıdi, al olarǵa shaǵyn ıkemdi robottar kómektespek. Jańashyldyq E-synypty sońǵy modelderdi qurastyrýda paıdalanylýda. Mashınanyń aldyńǵy terezesindegi jyldamdyq jáne naıvgatsııa jónindegi aqparatty kórsetetin dıspleıdi buryn eki robot qurastyrsa, qazir ony jumysshy atqarady nemese jeńil, ıkemdi robotqa júkteledi.
