Mercedes-Benz-tiń 33 myńnan astam qyzmetkeri jappaı narazylyq aktsııasyna shyqty
ASTANA. KAZINFORM – Germanııada Mercedes-Benz avtokontserniniń ondaǵan myń qyzmetkeri kompanııanyń jańa shyǵyndardy qysqartý baǵdarlamasyna qarsy narazylyq aktsııalaryna shyqty, dep habarlaıdy Der Spiegel.
Aktsııalarǵa IG Metall ónerkásiptik kásipodaǵy shaqyrdy. Uıym búgingi sharalar narazylyq tolqynynyń basy ǵana ekenin málimdedi. IG Metall dereginshe, el boıynsha ótken aktsııalarǵa 33 myńnan astam adam qatysqan.
Narazylyqtar Berlın, Dıýsseldorf, Gambýrg, Bremen, Germershaım jáne basqa da qalalarda ótti.
Der Spiegel basylymynyń jazýynsha, Germanııa boıynsha ondaǵan myń qyzmetker Mercedes-Benz kompanııasynda shyǵyndardy qysqartý sharalaryn kúsheıtý josparyna qarsy baraban, ysqyryq jáne plakattarmen narazylyq bildirgen.
IG Metall kásipodaǵynyń jetekshisi Krıstıane Benner Dıýsseldorftaǵy mıtıngide:
– Básekege qabilettilik týraly shyn máninde aıtqysy keletin adam eńbek jaǵdaılaryn ózgertýden bastamaýy kerek. Myqty avtomobıl ónerkásibiniń kilti – bolashaǵy bar ónimderge, óndiristik alańdarǵa jáne qyzmetkerlerge ınvestıtsııa salýda, – dedi.
Maýsym aıynda Mercedes-Benz daǵdarysqa baılanysty únemdeý sharalaryn kúsheıtetinin jarııalaǵan bolatyn. Soǵan sáıkes 108 myń qyzmetkerdiń shamamen 90 myńy shilde aıynda kútken syıaqysyn almaıdy.
Áńgime qyzmetkerdiń bir aılyq standartty jalaqysynyń 18,4 paıyzy kólemindegi jyl saıynǵy qosymsha tólem týraly bolyp otyr.
Eske sala ketsek, buǵan deıin Germanııada 23 naýryz kúni jalpyulttyq ereýilge baılanysty dárihanalar jabylǵanyn jazdyq.
