Menshik ıeleri birlestigi tóraǵasy úı keńesiniń quramyna kirýge mindetteledi
ASTANA. KAZINFORM — Qazaqstanda aldaǵy ýaqytta barlyq menshik ıesi birlestiginiń tóraǵasy úı keńesiniń quramyna kirýge mindetti bolmaq. Bul týraly Ónerkásip jáne qurylys mınıstrligi habarlaıdy.
— «Turǵyn úı qatynastary týraly» zańǵa engizilgen ózgeristerge sáıkes, 2025 jylǵy 15 qyrkúıekten keıin múlik ıeleri birlestiginiń tóraǵasy jalpy jınalysta 3 jyl merzimge saılanady jáne úı keńesiniń quramyna kirýge mindetti. Tóraǵa jáne úı keńesiniń múshesi retinde bekitilý úshin kandıdat páterdiń nemese turǵyn emes úı-jaıdyń menshik ıesi bolýy tıis, — delingen mınıstrlik taratqan aqparatta.
Sondaı-aq, páterdiń nemese turǵyn emes úı-jaıdyń menshik ıesimen birge turaqty turatyn otbasy músheleri (jubaıy/zaıyby, balalary, ata-anasy) de kandıdat retinde qarastyrylýy múmkin.
— Tóraǵa menshik ıeleri birlestiginiń múddesin sotta, memlekettik organdarǵa jáne ózge de uıymǵa senimhatsyz usynýǵa quqyly. Eger tóraǵa ýaqytsha eńbekke jaramsyz nemese basqa da sebepke baılanysty mindetin 15 kúnnen astam ýaqyt oryndaı almasa jáne menshik ıeleriniń jınalysy nemese úı keńesiniń hattamalyq sheshimimen bekitilse, úı keńesi quramynan múlik ıeleri birlestiginiń tóraǵasynyń mindetin ýaqytsha atqarýshyny saılaıdy, — delingen habarlamada.
Ýaqytsha tóraǵanyń ókilettigi jańa tóraǵa saılanǵanǵa deıin, biraq 6 aıdan aspaıtyn merzimge belgilenedi.
Sondaı-aq, tóraǵa kondomınıým nysanyn basqarý úshin kóppáterli turǵyn úıdiń basqarýshysymen eńbek shartyna otyrýǵa quqyly. Bul úshin oǵan jalpy jınalystyń sheshimi nemese úı keńesiniń, basqarýshyny jaldaý ókilettigi týraly sheshim qajet.
Kóppáterli turǵyn úıdi basqarýshy Qazaqstan Respýblıkasynyń azamaty bolýy tıis jáne onyń kásibı biliktiligin rastaıtyn qujat qajet.
Eńbek sharty jasalǵannan jáne barlyq rásim aıaqtalǵannan keıin, basqarýshy turǵyn úı ınspektsııasyna tıisti málimetti joldaıdy. Bul aqparat kondomınıým nysanyn basqarý sýbektileriniń jáne kóppáterli turǵyn úıdi basqarýshylardyń tizilimine engiziledi.
Eske salaıyq, elimizde 2023 jyldan bastap menshik ıeleri birlestigin onlaın tirkeýge bolady.