Mennı Pakıaony bir kezderi qazaqtyń qara balasy uryp qulatqan
ASTANA. QazAqparat - Sharshy alańda talaıdyń shańyn qaqqan Mennı Pakıaony bilmeıtinder kemde-kem, dep jazady «Habar 24».
Eger solardyń qatarynda bolsańyz, aıta keteıin, ol kásipqoı boksta 66 jekpe-jek ótkizip, 58-inde jeńiske jetken azýly sportshy. Tipti búgin osy myqty WBO tujyrymdamasy boıynsha álem chempıony ataǵyna talasady. Las-Vegastyń arenasynda «Altyn beldik» ıegeri Djessı Vargaspen kúsh synasady. Aıta berseń ataǵynan at úrkıdi, árıne. Biraq osy fılıpındik jigitti bir kezderi qazaqtyń qara balasy uryp qulatqanyn bilmeıtin shyǵarsyzdar.
Qazir elimizde kásipqoı bokstan nápaqa týyp júrgen jigitter kóp. Ártúrli promoýterlik kompanııalar ashylyp, bylǵary qolǵap sheberleriniń barlyq jaǵdaılary jasalýda.
Al 90-shy jyldardyń aıaǵynda kásipqoı bokspen shuǵyldanatyndar saýsaqpen sanarlyq edi. Solardyń biri Serikjan Eshmaǵanbetov bolatyn.
«Ol kezde zaman sondaı qıyn boldy. Ózderińiz bilesizder, 90-shy jyldary aqsha jaǵynan jaǵdaı qıyn edi. Zal tabý degen... Qazirgi ýaqytta promoýshen deıdi. Ol kezde sponsorlar kóp bolmaıtyn. Bolsa, bir-eki aı kómegin berip, keıin qınalǵan soń onsha kómektespeıtin. Ózimizdegi nıet bokstasyp, Qazaqstannyń atyn shyǵarý bolǵan», - deıdi ardager boksshy Serikjan Eshmaǵambetov.
Kásipqoı boksta 37 kezdesý ótkizip, sonyń 27-sinde jeńiske jetken Serikjan 12 jekpe-jekte qarsylastaryn nokaýtqa jibergen. Onyń sporttyq ǵumyryndaǵy aıtýly jekpe-jekteriniń biri 2003 jyly Mennı Pakıaomen ótti. Manıla qalasynda qarsylasyn 4-shi raýntta sulatyp salǵan Serikjan 13 jyl burynǵy kezdesýdi bylaısha eske alady.
«Salmaq ólsheý rásiminde siz Pakıaomen qalaı tóbelesesiz degen kezde, biz endi aǵylshynsha sózderimiz kóp emes azdaý. Sodan soń «artqa qaıtpaımyz, Mennı Pakıaońyzdy úshinshi raýndta qulatamyz, Alla buıyrsa» dedim. Endi úshinshi bolmasa da, tórtinshi raýndta bir qulatqanbyz...».
Kásipqoı rıngtegi sońǵy jekpe-jegin 2008 jyly 37 jasynda ótkizgen Eshmaǵambetov bylǵary qolǵabyn shegege ilgen soń, bapkerlikke bet buryp, qazirgi tańda shákirt tárbıelep júr. Al sol Serikjan kezdesýinen keıin juldyzy janǵan Mennı Pakıaony qazir kúlli álem tanıdy. Fılıpındik boksshy búgin WBO tujyrymdamasy boıynsha álem chempıony ataǵy úshin Las Vegasta Amerıkalyq Djessı Vargaspen qolǵap túıistiredi. Bul jekpe-jekti sizder jeksenbi kúni tańǵy 9:00 de Habar arnasynyń tikeleı efırinen tamashalaı alasyzdar.
