Mennı Pakıao resmı túrde bokstan ketetinin jarııalady

NUR-SULTAN. QazAqparat – Fılıppın prezıdenttigine óz kandıdatýrasyn usynǵan 42 jastaǵy segiz salmaq sanatynda burynǵy álem chempıony Mennı Pakıao óz jankúıerlerine bokstan ketetinin resmı túrde jarııa etti, dep habarlaıdy QazAqparat Sports.kz-ke silteme jasap.

«Álemdegi eń keremet jankúıerler men eń uly sportqa rahmet! Barlyq ádemi estelikter úshin rahmet. Bul – men qabyldaǵan eń qıyn sheshim. Óz armandaryńyzǵa umtylyńyzdar, tynbaı jumys jasańyzdar jáne ne bolatynyn baqylańyzdar. Qosh bol, boks», — delingen Pakıaonyń «Tvıtterdegi» jarııalanymynda.

Eske sala keteıik, sońǵy jekpe-jeginde, WBC tıtýly úshin bolǵan aıqasta Pakıao kútpegen jerden kýbalyq boksshy Iordenıs Ýgastan jeńilip qaldy. Ýgas pen Pakıao arasyndaǵy jekpe-jek Las-Vegastaǵy «TI-Mobaıl Arenada» ótti. 42 jastaǵy Pakıao úshin bul kezdesý 2019 jyldyń shildesinen bergi ótkizgen alǵashqy aıqasy edi. Ol kezde Pakıao Kıt Týrmandy upaı sany boıynsha jeńip, odan jartylaı orta salmaqta WBA Super nusqasy boıynsha belbeýdi tartyp alǵan bolatyn.