Jumysym shyǵarmashylyqty, fızıkalyq tózimdilikti qajet etedi — shıpajaı qyzmetkeri
ASTANA. KAZINFORM — 2025 jyl — Jumysshy mamandyqtar jyly. «Qazaqstan» shıpajaıynyń aýmaqtardy abattandyrý jónindegi mamany — Nasımı Nazım-Ogly Gýseınov mekemede 15 jyldan beri jumys istep keledi. Maman Kazinform tilshisine jumysynyń kúrdeli tustary, ómirlik tájirıbesi týraly aıtyp berdi.
— Nasımı myrza, siz «Qazaqstan» shıpajaıynda qashannan beri jumys istep kelesiz?
— Shıpajaıdy qaıta qurý kezinde munda jasyl qyzmet jáne kógaldandyrý qyzmetkeri retinde keldim. Maǵan jermen jumys istegen unaıdy. Men úshin bul medıtatsııanyń bir túri.
— Nelikten shıpajaıdaǵy jumysty tańdadyńyz?
— Birinshiden, munda qyzmetkerlerge qurmetpen qaraıdy, baǵalaıdy. Ózimdi qajet adamdaı sezinemin. Ekinshiden, men qonaqtarmen sóıleskendi, olardyń shıpajaı týraly pikirin tyńdaǵandy jaqsy kóremin. Meniń oıymsha, barlyq respýblıka beıbit ómir súrýi kerek, kórshi elderdiń ádet-ǵuryptary men mádenıetin qurmetteý kerek. Bizdiń shıpajaıǵa Reseıden ǵana emes, jaqyn shetelderden de adamdar keledi. Men ártúrli ult ókilderimen sóılese alamyn jáne bul orasan zor ómirlik tájirıbe.
— «Qazaqstanda» qansha jyl eńbek etesiz?
— 2010 jyldan bastap jumys isteımin. Bıyl meniń mereıtoıym — 15 jyl. Men úshin bul úlken kórsetkish. Óz jumysyńnyń nátıjesine qarap, buryn qalaı edi jáne qazir qalaı bolǵanyn baqylaı alasyń. Men otyrǵyzǵan ósimdikter men aǵashtardyń ósýin baqylap qana qoımaı, tabıǵattyń qalaı úılesimdi ornalasqanyn, qorshaǵan ortaǵa qamqorlyq jasaý kerek ekenin túsiný óte mańyzdy.
— Shıpajaı sizdi qalaı yntalandyrady, qaıdan shabyt alasyz?
— Shıpajaı óz qolónerim týraly únemi jańa nárseni úırenýge septesip keledi. Men olardy tájirıbe barysynda qoldanamyn. Odan bólek túrli forýmdardy kóremin, arnaıy ádebıetterdi oqımyn. Gúl otyrǵyzar kezde túsi jáne formasy ártúrli etýge tyrysamyn. Meni tabıǵat shabyttandyrady, odan ádemi ne bolýy múmkin?!
— Bıyl qandaı gúlderdi otyrǵyzýdy josparlap otyrsyz?
— Bizde aýmaqty kógaldandyrý jospary 3 bólikke bólinedi: kóktemde kesemiz, otyrǵyzý-qaıta otyrǵyzý jumystaryn júrgizemiz jáne gúlzarlardaǵy rettilikti saqtaımyz. Biz kóktemde jáne jazda egetin ósimdikterge basty nazar aýdaramyz. Jazda biz begonııa, ageratým, katarantýs, tagetes (barhat) otyrǵyzamyz.
— Bul gúlder erekshe kútimdi qajet etedi me?
— Ósimdikterdi únemi sýaryp otyrý kerek. Aramshópter der kezinde julmasa, ol gúlderdiń ósip-jetilýine kesirin tıgizýi múmkin. Men sýdy tamyrǵa ońaı jetkizý úshin topyraqty arnaıy quraldarmen aqyryn qopsytamyn.
— Siz jumys istegen jyldary shıpajaıda ne ózgerdi?
— 15 jyl ishinde kóp nárse ózgerdi. Áriptesterdiń shyǵarmashylyq áleýeti artty. Jumys kezeń-kezeńimen júrgizilip keledi. Joldar bezendirildi, sýburqaq ornatyldy. Shıpajaı aýmaǵy jasyl jelekke toldy. Sonymen qatar tıinder men qustar kóbeıdi.
— Sizdiń jumysyńyzdyń kúrdeliligi nede?
— Meniń jumysym shydamdylyqty, este saqtaý qabiletiniń jaqsy bolýyn, eńbekqorlyqty, úlken shyǵarmashylyqty, fızıkalyq tózimdilikti qajet etedi. Siz kez kelgen kún raıynda jumys isteýge daıyn bolýyńyz kerek. Meniń oıymsha, adam jumysyn jaqsy kórse, onda esh qıyndyq bolmaıdy.
Osyǵan deıin Essentýkıdegi «Qazaqstan» týrıster arasyndaǵy tanymaldyǵyn jylda dáleldep kele jatqanyn jazǵan edik.