«Meniń pirim – Súıinbaı» halyqaralyq jas aqyndar aıtysynyń jeńimpazdary anyqtaldy
ALMATY. KAZINFORM - Abaı atyndaǵy qazaq ulttyq pedagogıkalyq ýnıversıtetiniń uıymdastyrýymen «Meniń pirim – Súıinbaı» dástúrli VIII halyqaralyq jas aqyndar aıtysy ótti.
Jas aqyndar aıtysynyń maqsaty – aıtys ónerin jastar arasynda keńinen nasıhattaý, aqyndyq dástúrdi jańǵyrtý, jas aqyndardyń qabileti men sheshendik ónerin shyńdaý, olardyń kópshilikke tanylýyna múmkindik jasaý, tól ónerimizdi dáripteý.
Jyl saıyn dástúrli túrde ótetin jyr dodasyna elimizdegi JOO-lardan jas júırikter jáne Qyrǵyzstan, Mońǵolııa, Ózbekstannan kelgen jalpy sany 40-qa jýyq aqyn qatysty.
Bıyl qazaqtyń «Úsh báıteregi» Sáken Seıfýllın, Іlııas Jansúgirov, Beıimbet Maılınniń 130 jyldyǵyna arnalǵan alaman aıtystyń bas júldesin (500 000 teńge) - Álkeı Marǵulan atyndaǵy pedagogıkalyq ýnıversıtettiń stýdenti Qaıdarov Beksultan aldy.
Al І oryndy - Mońǵolııa eliniń jas júırigi Adılhan Іńkárbek (400 000 teńge), ІІ oryndy - (300 000 teńge) Qazaq ulttyq óner ýnıversıtetiniń stýdenti Qonarbaı Muhtar men Qorqyt ata atyndaǵy Kyzylorda ýnıversıtetiniń stýdenti Erjigit Dılnaz ıelendi.
ІІІ oryndy (200 000 teńge) - Qyrǵyzstannyń jas aqyny Qalybekuly Yryskeldi men Qazaq Ulttyq óner ýnıversıtetiniń stýdenti Ómirbekov Nurdaýlet jáne Kaspıı óńiri Bolashaq kolledjiniń stýdenti Alıev Janbolat qanjyǵasyna baılady.
Odan bólek, Temirhan Tebegenov atyndaǵy arnaıy júldeni Y.Altynsarın atyndaǵy Arqalyq pedagogıkalyq ınstıtýtynyń stýdenti Aqyljanov Aset, Orazaly Dosbosynov atyndaǵy arnaıy júldeni Ózbekstannyń jas júırigi Qojamuratov Rınat, Esenqul Jaqypbek atyndaǵy arnaıy júldeni Qazaq ulttyq óner ýnıversıtetiniń stýdenti Ergalıev Alıhan aldy.
Erik Asqarov atyndaǵy arnaıy júldeni Ó.Jánibekov atyndaǵy OQPÝ ýnıversıtetiniń stýdenti Sáýirhan Sultan, Áselhan Qalybekova atyndaǵy arnaıy júlde qoryn Qazaq ulttyq óner ýnıversıtetiniń stýdenti Tólenbek Nurtileý, Jarqynbek Naýshabekov atyndaǵy arnaıy júldeni Shákárim ýnıversıtetiniń stýdenti Erkinuly Qýanysh, Qonysbaı Ábilov atyndaǵy arnaıy júldeni Á.Marǵulan atyndaǵy pedagogıkalyq ýnıversıtetiniń stýdenti Taýekelov Nurserik, Ázimbek Janqulıev atyndaǵy arnaıy júldeni M.Dýlatı atyndaǵy Taraz óńirlik ýnıversıtetiniń stýdenti Báteı Aıat ıelendi.
QR Mádenıet qaıratkeri, Zeınolla Sánik atyndaǵy mádenıet qorynyń júldelerin Abaı atyndaǵy QazUPÝ stýdentteri Daıarbek Sanjar men Saýlet Nurshapaǵat ıelense, «Dara daryn» jobasynyń arnaıy júldesin Ózbekstannyń aqyny Qojamuratov Rınat, Ózbekáli Jánibekov atyndaǵy arnaıy júldeni Qazaq ulttyq óner ýnıversıtetiniń stýdenti Kádirbaı Batyrjan aldy.
«Alataý» dástúrli óner teatrynyń qoldaýymen, «ASSYLTAS» qoǵamdyq qorynyń quryltaıshysy Dýlat Tastekeevtiń demeýshiligimen ótken eki kúndik is-sharaǵa QR Eńbek sińirgen qaıratkeri, «Otan» ordeniniń ıegeri, «Aıtys aqyndary men jyrshy-termeshilerdiń Halyqaralyq odaǵy» RQB basqarma tóraǵasy Júrsin Erman, QR Parlamenti Májilisiniń depýtaty, QR Eńbek sińirgen qaıratkeri, belgili aıtysker aqyn Amanjol Áltaev, QR Mádenıet qaıratkeri, belgili aıtysker aqyn Serik Qalıev, Altyn dombyra ıegeri, aıtystyń aqtańgeri Erkebulan Qaınazarov, fılologııa ǵylymdarynyń doktory, professor Baltabaı Ábdiǵazıuly qazylyq etti.
Al sóz báıgesin aıtysker aqyn, O.Dosbosynov atyndaǵy aqyndar mektebiniń jetekshisi Shuǵaıyp Sezimhanuly júrgizdi.
