Meniń mıssııam ulttyq stıldegi dúnıelerdi satý emes, etno-dızaındy jańǵyrtý – Aıdana Erimbet
ASTANA. KAZINFORM – Aıdana Erimbet – Túrkistan oblysynyń týmasy. Kópbalaly otbasynan shyqqan. Ol – ulttyq ónerdi damytyp, nasıhattap júrgen etno-dızaıner. Qazaqstandyq dızaınerdiń qolynan shyqqan ulttyq stıldegi qolóner buıymdary Dubai Design Week-ke kórmesine qoıylǵan. Jerlesimizdiń ónerine shetelden qyzyǵýshylyq tanytqandar bar, atap aıtqanda, Qatar elinen suranys túsken.
«Ákemniń memlekettik qyzmetine baılanysty elimizdiń birqatar qalasynda turdyq. Qazir Astananyń turǵynymyn. Oqýshy kezimde orta mektep pen kórkemóner mektebinde oqydym. 9 synyptan keıin ákemniń keńesimen Astanadaǵy polıtehnıkalyq kolledjdiń ınterer-dızaın mamandyǵyna tústim. Ákem shyǵarmashylyǵyńmen qatar basqa da talantyńdy ashasyń degen-tuǵyn. Kolledj bitirgen soń mende eki tańdaý turdy, biri – «Shabyt» óner ýnıversıtetine túsý, ekinshi tańdaý – jumys istep, alystan arhıtektýra mamandyǵyn meńgerý. Kolledjden keıin elordada stýdııada jumys istedim, tájirıbe jınaı kele, ózimniń stýdııam bolǵanyn qaladym», - dedi Aıdana Erimbet.
Aıdana sýret, dızaın salasyna bala kúninen qyzyqqan.
«Onyń ishinde etno-dızaın bala kezimnen tanys dúnıe. 7 synypqa deıin qazaq bıimen aınalystym, odan bólek, qazaq ánderi men kúı tyńdap óskem. Sondyqtan ulttyq óner boıyma bala kúnimnen sińgen. Kolledjde oqyp júrgende kýrstyq, dıplomdyq jumystarym qazaqy naqyshtaǵy ınterermen baılanysty boldy. Jumys isteı bastaǵanda da qazaqı jobalardy, seniń júregińe jaqyn ǵoı dep maǵan tapsyratyn. Ýaqyt óte kele etno-ınterer dızaın salasynda tanyla bastap, óz kásibimdi júrgizýdi qolǵa aldym. Oıý-órnek, shańyraq, jylqy, sol sekildi ulttyq naqyshtardy sán, ınterer, grafıkalyq basqa da salada qoldanýǵa bolady. Biraq, bul jeńil assotsıatsııa, meniń maqsatym – ulttyq naqyshtardy, salt-dástúrdi, tarıhty, mádenıet pen ónerdi zertteý arqyly tereńirek qoldaný. ıAǵnı, maǵynaly jobalardy júzege asyrý. Odan bólek, ulttyq stıldi ótken tarıhpen, adamnyń shyqqan tegi, atadan balaǵa kele jatqan mura, buıym, zattarmen baılanystyrýǵa da bolady», - deıdi ol.
Onyń aıtýynsha, etno-ınterer, dızaın salasynda kóneden qalǵan kıiz úı, balbaltastar men petroglıfterdi oryndy qoldaný arqyly qazaq ónerin damytyp, nasıhattaýǵa bolady.
«Maǵan qonaqúıdiń VIP nómirleriniń ıntererin daıyndaý buıyrdy, ol jerde de ulttyq stıldi qoldanýǵa bolady. Mysaly, tarıhqa júginsek, qazaqtyń han, sultandary men baı-qýatty adamdary ádemi kıiz úıde, erekshe stıldegi kıimder kıip, qolóner buıymdaryn qoldanǵan. Qonaq úıdiń VIP nómirlerindegi kerýettiń joǵary jaǵyn hannyń taǵy sekildi dızaında jasap, keremet bir dúnıe shyǵardym. Odan bólek, ulttyq naqyshtar men stıldi qoǵamdyq oryndarda da sátti paıdalanýǵa bolady. Qazirgi tańda etno-dızaın damyp kele jatyr, sondyqtan ár dúnıeniń erekshe, qaıtalanbas bolǵany abzal», - deıdi dızaıner.
Sondaı-aq atalǵan maman etno-dızaındaǵy buıym, zattardyń suranysqa ıe bolyp kele jatqanyn aıtty.
«Ásirese, turmys zattary, ıaǵnı, jıhaz, ústel, oryndyqtar, ydys-aıaq, shamdar taǵy basqa. Taǵy bir baıqaǵanym, qazir ár otbasy úıinde qazaqı stılde bir dúnıeniń bolǵanyn qalaıdy. Biraq, buny trend dep aıta almaımyn, degenmen úrdis bar. Ulttyq óner arqyly etno-dızaıny tanytý, damytý ózimizden bastalady», - deıdi A. Erimbet.
Odan bólek, etno-dızaıner ulttyq stıldegi buıymdar nege qymbat degen pikirge qatysty oıymen bólisti.
«Ulttyq buıymdar qundy bolýy kerek dep oılaımyn. Onyń ústine qazir ulttyq stılde degen ataýmen mass-market qaptap ketti. Keıde tipti buıym, zattardyń bir-birinen aıyrmashylyǵy joq. Al etno-dızaındy rasymen damytamyz desek, ol eren eńbek pen izdenisti qajet etedi. Meniń mıssııam – ulttyq stıldegi zattar men basqa da dúnıelerdi jasap, satyp, tabys tabý ǵana emes, umytylyp bara jatqan qolóner túrlerin, etno-dızaındy saqtap, qaıta jańǵyrtý. Biz ulttyq naqyshtaǵy zattar men buıymdardy kóneden kele jatqan tehnologııaǵa súıene otyryp jasaımyz. Ol sheberlik pen ýaqytty talap etedi. Taǵy bir jaıt, bizdiń etno-dızaında jasap shyǵaratyn dúnıeler shekteýli kólemde. Sondaı-aq ulttyq naqyshtaǵy buıymdardy jasaýǵa memlekettiń, ınvestorlardyń qoldaýynsyz óz qarajatymyzdy jumsaımyz», - deıdi ol.
