Meniń de júregim aýyrdy – Pavlodar oblysynyń ákimi 7 jasar qyzdyń ólimi jaıly

Pavlodar oblysynda arnaýly organdarda esepte turǵan 300-den astam otbasy bar. Bul týraly Pavlodar oblysynyń ákimi Asaıyn Baıhanov aıtty, dep habarlaıdy Kazinform. 

Ortalyq kommýnıkatsııalar qyzmetindegi baspasóz máslıhatynda óńir basshysy 7 jasar Mılana Davydovanyń ólimine qatysty keńes ótkizgenin atap ótti. Aıta keterligi, sábı ólimine onyń anasy men tanysy kúdikti bolyp otyr.

«Maǵan da qorqynyshty boldy, sizder sııaqty meniń de júregim aýyrdy. Degemen biz qorytyndy shyǵardyq. Jumys istedik. Ekibastuzda keńes ótkizdim, árbir áleýmettik jáne memlekettik qyzmettiń kinásin tyńǵylyqty tekserdik ári tıisti sheshim qabyldadyq», - dedi ol BAQ ókilderiniń saýalyna oraı.

Onyń dereginshe, tek Ekibastuz qalasynda ǵana qolaısyz otbasy retinde 78, al oblys boıynsha 300-den astam otbasy tirkeýge alynǵan.

«Jergilikti ákimdiktiń ata-analardyń ádepsiz minez-qulqyna nazar aýdarmaǵany negizgi kiná sanalady. Sondaı-aq anasy bul jaıynda der ýaqytynda habarlamaǵan. Aýyl Ekibastuzdan 65 shaqyrym jerde ornalasqan. Nebári 7 úı ǵana bar sol aýylda anasy turǵan», - dedi oblys ákimi.

Eske sala keteıik, Mılana 17 qarasha kúni Ekibastuzdan 50 km jerdegi Besqaýǵa aýylynda joǵalyp ketti. https://kaz.inform.kz/news/pavlodarlik-politseyler-7-zhasar-kizdi-zdestrp-zhatir-a25e11/

Osy kúni keshkisin saǵat 9:00 shamasynda qyzdyń anasy polıtsııaǵa shaǵym túsirdi. Mılanany eki táýlik boıy 400 adam izdedi.

Tipti izdeý jumystaryna tikushaq pen kınologtar da jumyldyryldy. 

19 qarashada 7 jasar Mılananyń denesi qoqystan tabyldy.