«Meniń aıaldamam – meniń úıim»: Belsendi jastar qoǵam nazaryn mańyzdy máselege burdy
ASTANA. KAZINFORM - Qalalarda jaıly ınfraqurylym nysandary paıda bolǵannan keıin ókinishke qaraı oǵan zaqym keltiretin adamdar da tabylyp jatyr.
Ótken jylǵy statıstıkaǵa mán bersek, vandalızmge qatysty 1000-nan astam oqıǵa, 120 ákimshilik quqyq buzýshylyq jáne buzaqylarǵa qatysty 1244 hattama toltyrylǵan.
«Jańa adamdar» jastar qozǵalysy qoǵam nazaryn aýdarý maqsatynda «VandalızmOFF» jobasyn qolǵa aldy. Sóıtip, bas qalanyń Jeńis dańǵylyndaǵy aıaldamalardyń birin ózgertti. Aıaldama árkim kirip kórip, jaılylyǵyn sezine alatyndaı etip bezendirilgen. Mundaǵy maqsat – qorshaǵan ortany, qoǵamdyq keńistikti qadirleı bilý, qurmetpen ustanymdaryn sanamyzdaǵy qalypty túsinikke aınaldyrý.
«Qoǵamdyq nysandar – bizdiń qarjymyzǵa salynǵan ortaq úıimizdiń bir bóligi. Meniń aıaldamam – meniń úıim» aktsııasy arqyly buzaqylyq máselesin kóterip qana qoımaı, sonymen qatar árbir aıaldamaǵa, qalalyq ınfraqurylym nysandaryna qamqorlyq tanytyp jáne qajet bolsa, qoǵamnyń ózi oǵan qorǵan bolýy tıis ekenindigin kórsetemiz», - deı jastar qozǵalysynyń ókilderi.
Foto: "Jańa adamdar" jastar qozǵalysy
«Bizdiń úıimiz tabaldyryǵymyzdan attaǵannan keıin aıaqtalmaıdy. Bizdi qorshaǵan ortanyń bári bizdiń úıimiz, osyny túsinýimiz qajet. Osylaısha Astananyń qarapaıym aıaldamasyn biz jaıly páterge aınaldyrdyq. Sebebi tabaldyryǵymyzdan keıinginiń bári de bizdiki», - deıdi «VandalızmOFF» jobasynyń jetekshisi Akerke Ahpanbaeva.
