«Qoja. Jańa saıahat» fılmi kórermenge jol tartady
ASTANA. KAZINFORM — Áıgili «Meniń atym Qoja» fılminiń jalǵasy, zamanaýı formatta 13 naýryzdan bastap elimizdiń barlyq kınoteatrynda kórsetile bastaıdy. Fılm Almaty oblysynyń Kegen aýdany Jalańash, Saty aýyldarynda túsirildi.
— Klassıkalyq týyndyny qaıta jandyrý ıdeıasy, «Qalam» mektebinen bastaldy, bul balalardy matematıkaǵa baýlıtyn mektep. Oılana kele, balalarǵa Qoja unaıdy dep, bir mınýttyq kreatıvti vıdeo túsirip, áleýmettik jelige júktedik, halyqtyń saǵynyshy birden baıqaldy. Sodan bul fılmdi qaıta jandandyryp, túsirmeske degen oı kelip, nartáýekel ettik. Basy qoıyńdar, qate ıdeıa degender boldy, bul úlken jaýapkershilik, sol deńgeıde túsire almasańdar halyqtyń synyna qalasyńdar dep aıtty, degenmen sheshingen sýdan taıynbas degendeı fılmdi túsirýge kirisip kettik, — dedi «Qoja Jańa saıahat» fılminiń rejısseri Qýat Ibragımov tusaýkeser rásiminde.
Onyń aıtýynsha, fılmniń jańa nusqasynyń stsenarıinde ózgeris bar. Berdibek Soqpaqbaevtyń shyǵarmasyna tolyq negizdelgen.
— Mysaly, alǵashqy fılmde Qoja ǵaryshker bolýdy armandasa, bizdiń fılmde jazýshy bolǵysy keledi jáne sol armany oryndalady. Sebebi kitapta solaı jazylǵan. Fılmdi túsirýge 1 aıdan asa ýaqyt ketti. Akterlik quramǵa kelsek, ártisterdi Qazaqstan boıynsha izdep, kastıng ótkizdik jáne irikteý uzaqqa sozyldy. Keıipkerlerdiń 70 paıyzyn áleýmettik jeliden taptyq desem bolady, kásibı ártister de bar. Biraq, Qojanyń róline talas bolǵan joq, bizde bir ǵana kandıdat boldy, jalpy fılmdi túsirý ıdeıasy sol Qojaǵa uqsaıtyn balany kórgennen keıin týyndady, búginginiń Qojasyn kórsetý kerek boldy. Qojany somdaǵan balanyń esimi Aıqyn, ol aýyldyń qarapaıym balasy, eshqandaı akter bolýdy armandamaǵan. Bizdiń Qojanyń týmasy alǵashqy fılmdegi Qojaǵa uqsas, — deıdi ol.
Fılmniń jabyq kórsetilimine jınalǵan jurttyń qarasy kóp boldy. Kórermender fılmde Qojanyń rólin somdaǵan Aıqyn Elýbaımen jarysa sýretke tústi. Arasynda ýaqyt taýyp jas talantpen tildesken edik.
15 jasar Aıqyn Elýbaı Shymkenttiń irgesindegi Aqbulaq aýylynyń týmasy qazir 9 synypta oqyp jatyr.
— Meniń túrim Qojaǵa uqsaǵanymen ártistik bilik-bilimim bolmady, sondyqtan birinshi kastıngten óte almadym, ekinshi ret baq synaý úshin 4 aı daıyndaldym. Biraq, fılmde baıaǵy Qojanyń beınesin somdaǵan joqpyn, ózimdi oınadym, sebebi meniń túr-álpetim, júris-turysym Nurlan Segizbaev atama keledi. «Meniń atym Qoja» fılmin alǵash osydan 2 jyl buryn kórdim. Jalpy ózim kókpar shabamyn, traktor aıdaımyn, — deıdi jas ártis.
Jasóspirimniń Qojaǵa uqsaıtynyn fılm túsirilimine deıin biraz adam aıtqan.
— Aǵam meni vıdeoǵa túsirip biz Qojany taptyq dep jelige saldy, sodan keıin jelide tanyla bastadym. Osy fılmge kastıng dırektory tartty, sonymen qatar Kalifarniya degen ánshiniń klıpine tústim. Bıyl 9 synypty bitirgen soń, Almaty qalasyna ártis mamandyǵyna oqýǵa tússem dep josparlap júrmin, — deıdi ol.
Jas ártisten mekteptegi sabaq úlgerimi týraly suraǵan edik, qınalǵan túr tanytyp «ortasha» dep qysqa qaıyrdy.
Aıqyn Elýbaıǵa «Qoja. Jańa saıahat» fılminen bólek, kınoǵa túsýge biraz usynys túsipti, biraq jasóspirim aldymen oqýym kerek dep otyr.
— Usynys óte kóp, meni «Joshy han» fılmine túsýge de shaqyrdy, men bolashaqta akterlik joldy tańdaımyn dep otyrmyn, sondyqtan maǵan aldymen bilim alý qajet, — deıdi ol.
Jasóspirim ónerden bólek, sportqa da jaqyn, 3 jyl boks jáne 7 jyl kúrespen áýestenipti jáne bos ýaqytynda atqa mingendi unatady.
Eske sala ketsek, 2022 jyly elordada «Meniń atym Qoja» fılminiń keıipkerine eskertkish ornatyldy.
Sondaı-aq byltyr qarashada Parıjdegi ıÝNESKO shtab-páterinde «Meniń atym Qoja» fılminiń kórsetilimi ótti.