Menıngokokkpen kúrestegi dárigerlerdiń basty kemshiligi ne
«Otyrysqa qatysyp otyrǵandaryńyzdyń, ekrannan kórip otyrǵandarymnyń barlyǵy óz isiniń kásibı mamany ekendigine daý joq. Sizderdiń árqaısyńyzdy bilemin dep te aıta alamyn. Birge úlken jumys atqardyq. Degenmen, kóńilderińizge qaıaý túsirsem de aıtarym, kóptegen problemalaryńyz qalyp otyr jáne bul problemalardy áli kúnge deıin sheshe almaı otyrsyzdar», - dedi Tamara Dúısenova «Nur Otannyń» ortalyq apparatynda barlyq óńirlermen beınekonferentsııa arqyly ótken jıynda.
Onyń atap ótýinshe, eń basty kemshilik densaýlyq saqtaý uıymdaryndaǵy oryndaýshylyq tártiptiń tómendigi bolyp otyr.
«Sizder oǵan durys monıtorıng júrgizbeısizder. Alekseı Vladımıruly, bul vedomstvolaryńyz jetekshilik etetin uıymdarǵa da qatysty», - dedi partııanyń jaýapty hatshysy Densaýlyq saqtaý vıtse-mınıstri Alekseı Tsoıǵa qarata.
Tamara Dúısenova densaýlyq saqtaý uıymdarynda juqpaly aýrýlarǵa qatysty saqtyqtyń da joqtyǵyn synady.
«Mine dál osy búkil densaýlyq saqtaý júıesiniń jumysyna barynsha nuqsan keltirip otyr. Búginde 24 saǵat medıtsınalyq qyzmet kórsetetin kásibı dárigerler joq dep aıta almaımyn. Degenmen, búgingi kúni oryn alyp otyrǵan ahýal osy eki problemanyń áli kúnge bar ekendigin jáne ony sheshe almaǵandyǵymyzdy kórsetip otyr», - dedi ol.
Sonymen qatar Tamara Dúısenova menıngokokktiń taralý sebebimen emes, saldarymen kúresip jatqanymyzdy, menıngokokke shaldyqqandardyń barlyǵyn bir antıbıotıkpen emdeýge bolmaıtyndyǵyn aıtqan edi.
