Menıngokokk juqtyrǵan ShQO turǵyny aýyr jaǵdaıda Astana aýrýhanasyna tústi
ASTANA. QazAqparat - Astanaǵa kelgen ShQO turǵynynan menıngokokk juqpasy anyqtaldy, dep habarlaıdy QazAqparat tilshisi.
Naýqas 1 qazan kúni Astanaǵa kelgen jáne Astana juqpaly aýrýlar aýrýhanasynyń jansaqtaý bólimine túsken.
«1985 jyly týǵan shyǵysqazaqstandyq 1 qazan kúni Astana qalasynyń juqpaly aýrýlar aýrýhanasyna jedel járdem kóligimen jetkizildi. Zerthanalyq tekserýler arqyly menıngokokk dıagnozy rastaldy. Juqpa týraly shuǵyl habar kelip túskennen bastap, departament mamandary ınfektsııaǵa qarsy jumystardy bastady. Astana boıynsha naýqaspen qatynasta bolǵan 6 adam anyqtaldy, onyń ekeýi bala. 2 qazan kúni barlyǵy bakterologııalyq tekserýden ótti jáne olardyń eshqaısysynan aýrý tabylmady», - dep túsindirdi Memlekettik-sanıtarlyq epıdemıologııalyq qadaǵalaý komıtetiniń Astana qalalyq departamentiniń Epıdemıologııalyq qadaǵalaý bóliminiń bas mamany Aqmaral Meıirmanova.
Epıdemologııalyq anamnez jınaý barysynda naýqastyń 13 jáne 30 qyrkúıek kúnderi Qaraǵandy oblysynyń Jezqazǵan qalasynda bolǵany anyqtalǵan. 2 qazan kúni Qaraǵandy oblysyna habar berilip, juqpaǵa qarsy sharalar júrgizilgen.
«Naýqas esin jıdy. Qazirgi ýaqytta jaǵdaıy ortasha aýyr. Ol patogenetıkalyq, sımptomatıkalyq jáne antıbakterııalyq em qabyldap jatyr. Bul kúz mezgilinde Astanada tirkelgen birinshi oqıǵa, onda da aýrýdy Astana qalasynda juqtyrmaǵanyn atap ótken jón», - dedi A. Meıirmanova.
Mamannyń aıtýynsha, jyl basynan beri Astanada menıngokokk juqpasyna qatysty 7 jaǵdaı tirkelgen jáne ólim-jitim bolmaǵan.
«Astanadaǵy epıdemıologııalyq jaǵdaı turaqty, ótken jylǵy kezeńmen salystyrǵanda kórsetkishter azaıǵan. Infektsııany juqtyrmaý úshin taza aýada kóbirek júrip, bólmelerdi jeldetý kerek jáne aýrý juqtyrý qaýpi bar oryndarǵa barmaǵan jón», - dep keńes berdi A. Meıirmanova.
