Menıngokokk juqpasynan kóz jumǵan almatylyqtardyń ekeýiniń aýzy berik bolǵan
«27 jastaǵy Súleımenov Oljas qabyldaý bólimine kelgende aýzym berik dep taǵaıyndaǵan dárini qabyldamaǵan. Sosyn aýrýhanaǵa jatýdan bas tartyp, úıine ketken. Keshke deıis sý, dári, tamaq ishpeı, jatyp qalǵan. Jaqyndary ol uıyqtap jatyr dep kóńil aýdarmaǵan. Biraz ýaqyttan soń baryp ol aýrýhanaǵa aýyr jaǵdaıda keldi. Ókinishke oraı, menıngokokk juqpasynyń epıdemıologııalyq naýqany Ramazan aıymen tuspa-tus keldi. Orazany saý adamǵa ustaý kerek. Jaǵdaıy nasharlasa, qyzý kóterilse, orazany toqtatyp, dári qabyldaý kerek. Qaıtys bolǵan 2 adamnyń aýzy berik bolǵany anyqtaldy», - dedi Almagúl Dúısenova.
Sonymen qatar, qalalyq Densaýlyq saqtaý basqarmasynyń basshysy Serikbol Mýsınov marqum bolǵan Oljastyń aýrýhanaǵa jatýdan bas tartqanyn aıtty.
«Ol juqpaly aýrýhanalar aýrýhanasyna túskende dárigerler antıbakterıaldyq terapııa taǵaıyndaǵan. Biraq ol ózi dári qabyldaýdan da, aýrýhanaǵa jatýdan da bas tartqan. Ókinishke oraı birneshe saǵattan soń ol aýrýhanaǵa óte aýyr jaǵdaıda jetkizildi. Onyń ómirin arashalap qalý múmkin bolmady», - dedi Serikbol Mýsınov.
Munyń aldynda Almaty ortalyq meshitiniń bas ımamy Erkinbek Shoqaev naýqastanǵan jaǵdaıda aýyz ashýǵa sharıǵat ruqsat beretinin habarlaǵan bolatyn.
Qalalyq Qoǵamdyq densaýlyqty saqtaý departamentiniń málimetinshe, búginde Almatyda 48 adam menıngokokk juqpasyna kúdik týyndaǵan soń dárigerlerge júgingen. Onyń ishinde 32 adamda menıgokokk juqpasy bar ekeni zerthanalyq túrde rastaldy.
Almatyda 5 adam kóz jumdy. Olardyń 2-eýi - 5 jasqa deıingi balalar. Eki balanyń anasy aýrýdyń alǵashqy belgileri bastalǵanda jekemenshik emhanadaǵy ózderiniń jeke dárigerlerinen keńes alǵany belgili boldy.
Syrqattanǵandardyń biri - 27 jastaǵy órt sóndirýshi Oljas Súleımenovtyń aýrýy nebári 12 saǵattyń ishinde asqynyp, kenetten kóz jumǵan.
Jalpy, Almaty oblysynda 4 adam kóz jumdy.
