Menıngokokk ınfektsııasy boıynsha jaǵdaı turaqty - Jandarbek Bekshın
«Qazir respýblıkada menıngokokk ınfektsııasy boıynsha jaǵdaı turaqtandyryldy. Búgingi tańda 1 syrqattanýshy bar ol Aqtóbe oblysynda emdelýde. Al jalpy jyl basynan beri 91 menıngokokk ınfektsııasy jaǵdaıy tirkelgen. Elimiz boıynsha atalǵan ınfektsııany juqtyrý 100 myń adamǵa shaqqanda 0,5 kórsetkishti quraıdy, bul shekti deńgeıden 4 ese tómen», - dedi QR DSM Qoǵamdyq densaýlyq saqtaý komıtetiniń tóraǵasy, Qazaqstannyń bas memlekettik sanıtarlyq dárigeri Jandarbek Bekshın OKQ-de ótken baspasóz máslıhatynda.
Sonymen qatar, elimizdiń bas sanıtary qyzylsha aýrýynyń búgingi jaǵdaıy týraly da aıtty.
«Ústimizdegi jyldyń 1 qarashasyndaǵy jaǵdaı boıynsha, elimizde qyzylshanyń 201 jaǵdaıy tirkelgen, onyń ishinde 14 jasqa deıingi balalar sany - 173 ( 85%), atalǵan aýrý jaǵdaıyn 100 myń turǵynǵa shaqqanda 0,08 bul shekti deńgeıden 3,4 esege tómen. Degenmen Eýropa elderinde bul aýrý túri órship turǵanyn umytpaý kerek, atap aıtsaq, 2018 jyldyń 1 qarashasy boıynsha Eýropa elderinde 70 myńnan astam jaǵdaı tirkelgen», - dedi ol.
Odan bólek, J.Bekshınniń sózine qaraǵanda, Qazaqstanda ótken jylmen salystyrǵanda teri leıshmanıozy 63%, gımenolıpedoz 48%, lıamblıoz 15%, JRVI 13%, brýtsellez 12,7 %, dızenterııa 11%, enterobıoz 7%, týberkýlez 6%-ǵa tómendegen.
«Aýa raıynyń sýytýyna baılanysty JRVI jáne tumaýmen syrqattaný maýsymy bastalady. Osyǵan baılanysty qyrkúıekten bastap elimizdiń barlyq óńirlerde tıisti sharalar qoldanyldy. Osy jyly tumaýǵa qarsy 1 mln 600 vaktsınatsııa satyp alynyp, ol 2 025 842 adamǵa egildi», - dedi J.Bekshın.