Menıngıtten kóz jumǵan stýdent oqıǵasynyń mán-jaıy anyqtaldy
ALMATY. QazAqparat - Almatyda stýdenttiń menıngıtten qaıtys bolýynyń mán-jaıyn Almaty qoǵamdyq densaýlyq saqtaý departamentinde aıtty, dep habarlaıdy QazAqparat tilshisi.
Almaty qoǵamdyq densaýlyq saqtaý departamentiniń basshysy Aızat Moldaǵasymova stýdenttiń menıngıtten qaıtys bolýyna onyń dárigerge kesh kelgendigimen túsindiredi.
«Qaıtys bolǵan stýdent Qazaq kólik jáne baılanys akademııasynda oqyǵan. Ol jataqhanadaǵy bólmede bes adammen turǵan. Balalar úılerine qaıtýǵa jınalyp júrgen. Tekserý barysynda anyqtalǵandaı, stýdentter jańbyrdyń astynda qalyp qoıǵan. Jańbyrǵa malynǵan kúıi temirjol vokzalyna barǵan. Qaıtys bolǵan stýdent aýyrýy ábden asqynǵannan keıin ǵana dárigerge kelgen. Sol kúni keshkisin onyń temperatýrasy kóterilgen, ol ózdiginen emdelmek bolǵan. Kelesi kúni denesin bórtpe basqanda, jedel járdem shaqyrǵan. Ókinishke oraı, menıngokok sepsısiniń formasy bastalǵan. Oǵan kómek kórsete almadyq, sebebi tym kesh boldy», - dedi Aızat Moldaǵasymova.
Onyń aıtýynsha, kóz jumǵan stýdent 118 adammen baılanysta bolǵan. Olardyń barlyǵy medıtsınalyq baqylaýǵa alynǵan.
«Kóz jumǵan stýdentpen birge turǵandarda qabynýdyń belgileri bolǵan. Biz olardyń barlyǵyn oqshaýladyq. Ýaqytynda kómek kórsettik. Ázirshe zerthanalyq rastaý joq, biraq aman alyp qalǵan ekinshi naýqasta menıngıttiń qaýpi bar. Onyki asqynǵan túri edi. Qazirgi tańda onyń jaǵdaıy jaqsy jáne palataǵa shyǵaryldy», - dep málimdedi Aızat Moldaǵasymova.
