Menıngıtten qaıtys bolǵan eki búldirshin qaralǵan emhanalar jaýapqa tartylady
ALMATY. QazAqparat - Almatyda menıngokokk juqpasynan qaıtys bolǵan eki balanyń jaǵdaıynyń aýyrlyǵyn baqylaı almaǵan jekemenshik emhanalardyń basshylyǵy jaýapqa tartylady, dep habarlaıdy QazAqparat tilshisi.
Bul týraly óńirlik kommýnıkatsııalar qyzmetinde ótken brıfıng barysynda qalalyq Qoǵamdyq densaýlyqty saqtaý departamentiniń basshysy Aızat Moldaqasymova aıtty.
Onyń aıtýynsha, qaıtys bolǵan eki búldirshin alǵashqy belgileri paıda bolǵan kezde jekemenshik emhanaǵa qaralǵan.
Qazir departament patalogoanatomııalyq zertteý nátıjesin kútip otyr.
«Saraptama nátıjesinde arnaıy tekserý bastalady. Tekserý boıynsha medıtsınalyq mekemeniń qyzmet kórsetý sapasy, jedeldigi, dıagnostıka júrgizý sapasy anyqtalady. Sodan soń materıaldar quqyq qorǵaý organdaryna jiberiledi», - dedi Aızat Moldaqasymova.
Onyń aıtýynsha, eger jekemenshik emhanalar aýrýdy der kezinde anyqtaı almaı, ýaqyt sozǵany rastalsa, Qazaqstan zańnamasy boıynsha birneshe jaza qarastyrylǵan.
«Eń aldymen medıtsınalyq qyzmet kórsetýge lıtsenzııasynan aırylady. Sondaı-aq, akkredıtatsııasy toqtatylady. Sonymen qatar, balany alǵash qarap, qate dıagnoz qoıǵan dárigerlerge jeke jaza qoldanylady», - dedi ol.
Departamenttiń málimetinshe, búginde Almatyda 48 adam menıngıt jutyrdym degen kúdikpen dárigerge júginse, 32 adamda zerthanalyq túrde rastalǵan.
Aıta ketý kerek, QR Densaýlyq saqtaý mınıstri Eljan Birtanovtyń málimdeýinshe, qaýipti derten jyl basynan beri Qazaqstanda 12 adam kóz jumǵan.
«Jyl basynan beri Qazaqstanda menıngıt ınfektsııasyn juqtyrǵan 58 naýqas tirkeldi. Olardyń 18-i 14 jasqa deıingi balalar. Bıyldan bastap atalǵan dertten 12 adam kóz jumdy, sonyń ishinde beseýi 14 jasqa deıingi jetkinshekter», - dedi mınıstr Ortalyq kommýnıkatsııalar qyzmetinde.
Almatyda 5 adam kóz jumdy. Olardyń 2-ýi 5 jasqa deıingi balalar. Eki balanyń anasy aýrýdyń alǵashqy belgileri bastalǵanda jekemenshik emhanadaǵy ózderiniń jeke dárigerlerinen keńes alǵany belgili boldy.
Almaty oblysynda 4 adam kóz jumdy.
