Menıngıtke shaldyqqan sarbazdyń jaǵdaıy aýyr -basqarma
NUR-SULTAN. QazAqparat - Almaty qoǵamdyq densaýlyq saqtaý basqarmasy basshysynyń orynbasary Ásel Bısembaeva menıngogok aýrýyna shaldyqqan merzimdi áskerı qyzmettegi sarbazdyń jaǵdaıy týraly aıtyp berdi, dep habarlaıdy QazAqparat tilshisi.
«ShQO-daǵy áskerı bólimderdiń birindegi áskerı qyzmetshini sanavıatsııa jelisi arqyly Maqanshy aýylynan asa aýyr jaǵdaıda alyp keldi. Onyń 24 mamyrda qatty aýyryp qalǵanyn bildik. Naýqastyń basy aýyryp, temperatýrasy 40-qa deıin boldy. Medıtsınalyq sanıtarlyq bólimniń qyzmetkerlerimen ol Maqanshydaǵy aýrýhanaǵa jetkizilip, nevrolog qaraýynan ótip, ınfektsıonısttiń keńesin alǵan. Aqyry, shuǵyl túrde sanıtarlyq avıatsııa arqyly Almaty qalamysynyń UKQ aýrýhanasyna jetkizildi», - dedi Ásel Bısembaeva Nur-Sultandaǵy ınfektsııalyq aýrýlardyń aldyn alý boıynsha respýblıkalyq shtabtyń otyrysynda.
Onyń aıtýynsha, jolda sarbazdyń denesinen diril baıqalǵan.
«Infektsııalyq shoktyń úshinshi satysyndaǵy belgimen onyń jaǵdaıy asa aýyr ekeni belgili boldy. Dárigerlerdiń konsolıýmy onyń jaǵdaıyn turaqtandyrý boıynsha sheshim qabyldady. Kelesi kúni patsıent Almaty qalasynyń klınıkalyq ınfektsııalyq aýrýhanasyna aýystyryldy. Oǵan menıngogok ınfektsııasy, bas mıynyń isinýi, tynys joldarynyń buzylýy dıagnozy qoıyldy», - dedi spıker.
Ásel Bısembaeva habarlaǵandaı, patsıent týraly shuǵyl habarlama áskerı bólimniń sanıtarlyq bólimshesine joldanǵan.
«Almaty qalasynyń qoǵamdyq densaýlyq saqtaý departamentine de habarlandy. Emdeý zertteý dıagnostıkasynyń hattamasyna sáıkes júrgizilip jatyr. Qazirgi tańda patsıent jaǵdaıynyń jaqsarý dınamıkasy baıqalady. Dese de, jaǵdaıy aýyr. Qazirgi ýaqytta patsıenttiń jaǵdaıy birqalypty aýyr», - dep túıdi ol.
Eske sala ketsek, osydan birneshe kún buryn Shyǵys Qazaqstan oblysynyń áskerı bólimshesinde menıngıt ınfektsııasyn juqtyrǵan sarbaz Almatyǵa jetkizilgen bolatyn.
