Menıngıtke qarsy qansha adam antıbıotık alyp jatqany belgili boldy

ASTANA. QazAqparat - Menıngıtke shaldyqqandarmen baılanysta bolǵan 4 mynan astam adamǵa antıbıotıktik profılaktıka júrgizilip jatyr. Bul týraly Ortalyq kommýnıkatsııalar qyzmetinde QR Densaýlyq saqtaý mınıstri Eljan Birtanov málim etti, dep habarlaıdy QazAqparat.

«Qoǵamdyq densaýlyq saqtaý komıteti qyzmetkerleri menıngıtke shaldyqqandarmen baılanysta bolǵan adamdardy barsha óńirlerde anyqtap jatyr. Búginde 4 136 adam anyqtaldy. Bul adamdar naýqastarmen kúnine 3 saǵat jáne odan artyq merzimde baılanysta bolǵandar. Olardyń barlyǵy antıbıotıktik profılaktıkamen qamtyldy», - dedi mınıstr.

Sonymen qatar atalǵan adamdardy keı kezde anyqtaý ońaıǵa túspeıtinin jetkizdi.

«Qazirgi kezde barsha qajetti jumystar júrgizildi jáne bizdiń sanıtarlyq qyzmet ol adamdardy anyqtady», - dedi vedomstvo basshysy.

Birtanov qazirgi kezde Densaýlyq saqtaý mınıstrligi vaktsına baǵasynyń sharyqtaýyna jol bermeý sharalaryn qabyldap jatqanyn atap ótti.

«Ekpe quny qymbattaý, ıaǵnı ol qymbat farmatsevtıkalyq ónim retinde belgili. Búginde dári-dármektiń baǵasy sharyqtamaýy úshin tıisti sharalardy atqaryp jatyrmyz», - dep túsindirdi ol.

Mınıstrdiń málimetinshe, áskerıler, stýdentter men balalar arasynda vaktsınalaý bastalǵan joq. Sebebi Densaýlyq saqtaý mınıstrligi bul sheshimdi qoldamaıdy.

Belgili bolǵandaı, vaktsına búginde bólshek jelide emin-erkin saýdalanyp jatyr. 330 adam menıngıtke qarsy óz erkimen ekpe saldyrǵan.