Menıngıt Nıderlandy men Ulybrıtanııada da beleń alyp keledi
AMSTERDAM. QazAqparat - Nıderlandyda bıyl menıngıt juqtyrǵan naýqastardyń sany rekordtyq kórsetkishke jetti, dep jazady nltimes.nl.
Portal bergen málimetterge qaraǵanda, juqpaly aýrýdan jyl basynan beri 11 adam kóz jumyp, taǵy 57-si jansaqtaý bólimine jatqyzylǵan. Nıderlandy Ulttyq densaýlyq saqtaý jáne qorshaǵan ortany qorǵaý ınstıtýtynyń (RIVM) málimdeýinshe, elde menıngokokk ınfektsııasyn qozdyrǵyshtary - W serotobynyń dıplokokktary.
Portaldyń málimdeýinshe, bıylǵy jarty jylda menıngıtten qaıtys bolǵandar sany byltyrǵy jalpy kórsetkishke jetip úlgergen.
Ókinishke qaraı, qazir Nıderlandyda ınfektsııadan qorǵaýshy vaktsına jetispeıdi. Byltyr el úkimeti 14 aılyq balalar men mektep oqýshylaryna menıngıtke qarsy vaktsına egý týraly sheshim shyǵarǵanymen, preparat jetispeýshiliginiń saldarynan 14 jastaǵy balalarǵa dári egý ústimizdegi jyldyń qazanyna deıin shegerilgen.
Dutchnews.nl habaryna qaraǵanda, menıngıttiń osy túri jyldam damıdy. Másele mynada, 2015 jylǵa deıin W bakterııasy qozdyrǵan menıngıtten qaıtys bolý faktileri tirkelmegen. Orta eseppen jyl saıyn 4 naýqas tirkelip otyrǵan. Biraq byltyr jaǵdaı kúrt ózgerip, 2017 jyldyń alǵashqy tórt aıynda 27 adam aýrýhanaǵa jatqyzylǵan. Ústimizdegi jyldyń osy kezeńinde Nıderlandyda aýrýhanaǵa túskender sany 50-ge jetken.
Menıngıt ınfektsııasynyń alǵashqy belgileri - sýyq tııý jáne grıppen baılanysty sımptomdar. Sodan keıin naýqastyń jaǵdaıy kúrt nasharlaıdy. Menıngıttiń aıqyn belgisi moıyn bulshyqetteriniń qozǵalmaı qalýy bolyp tabylady. Naýqas adam 24 saǵattyń ishinde qaıtys bolýy múmkin.
Dutchnews.nl, sondaı-aq Ulybrıtanııada da menıngıtpen naýqastanǵandar sany artyp kele jatqanyn habarlady.
