Menıngıt: Qyzylordada jedel járdemge júgingender kóbeıdi
QYZYLORDA. QazAqparat - Qyzylorda oblysynda sońǵy kúnderde jedel járdem qyzmetine júgingen turǵyndar qatary kóbeıgen. Bul menıngokokk ınfektsııasyna baılanysty turǵyndardyń saqtyǵynan týyndap otyr, dep habarlaıdy QazAqparat tilshisi.
«Oblysta 5 maýsymdaǵy málimet boıynsha jedel járdem kómegine júgingender qatary artqany ańǵarylady. Naqty aıtqanda, sol ýaqytta oblysta 1300 márte shaqyrtý túsken. Osylaısha shaqyrtý kúndelikti deńgeıinen 25 paıyzǵa artqan. Onyń ishinde dene qyzýyna baılanysty shaqyrtýlar 15 paıyzǵa ósken. Ol turǵyndardyń menıngokokk ınfektsııasy syrqatyna beı-jaı qaramaıtynyn kórsetedi», - deıdi oblystyq qoǵamdyq densaýlyq saqtaý departamentiniń basshysy Ulbosyn Ahanaeva.
Oblystyq qoǵamdyq densaýlyqty saqtaý departamentiniń basshysy Ulbosyn Ahanaevanyń aıtýynsha, naýqaspen qarym-qatynasta bolǵandarǵa medıtsınalyq baqylaý áli júrgizilýde. Baılanysta bolǵan 65 azamattyń 50-ne júrgizilgen profılaktıkalyq em sharalary aıaqtaldy. Qalǵan 15 azamat dári-dármekpen emdelýde. Al, 10 kúnnen keıin aýrýdyń oshaq orny jabylady.
Esterińizge sala ketelik, ústimizdegi jyldyń 31 mamyrynda Qyzylorda oblysy Jańaqorǵan aýdanynda menıngokokk ınfektsııasy dıagnozy boıynsha 27 jastaǵy jigit aýrýhanaǵa jatqyzylyp, ol birer kúnnen keıin qaıtys boldy. Tıisti sala mamandary Qyzylorda oblysy menıngokokk ınfektsııasy boıynsha qaýipti aımaqtar qatarynda joq ekenin aıtqan edi. Qazirgi kúnderi Syr óńirinde menıngıtke qarsy vaktsınatsııa júrgizilýde.
