«Meniń Jetisýym» óńirlik sharalary bastalady
TALDYQORǴAN. QazAqparat - Almaty oblysynyń ákimi Amandyq Batalovtyń tóraǵalyǵymen Qoǵamdyq sanany jańǵyrtý baǵdarlamasyn iske asyrý jónindegi óńirlik komıssııanyń otyrysy ótti. Onda Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasyn iske asyrý barysynda atqarylyp jatqan jumystar týraly oblys ákiminiń orynbasary Jaqsylyq Omar baıandama jasady, dep habarlaıdy QazAqparat oblys ákiminiń baspasóz qyzmetine silteme jasap.
J. Omardyń aıtýynsha, qazirgi kezde oblysta qoǵamdyq sanany jańǵyrtý baǵdarlamasyn iske asyrý jónindegi óńirlik komıssııa qurylǵan. Bul komıssııa qazaq tiliniń latyn álipbıine kezeń-kezeńmen kóshýi, «Jańa gýmanıtarlyq bilim. Qazaq tilindegi 100 jańa oqýlyq», «Týǵan jer», «Qazaqstannyń sakraldy geografııasy», «Jahandaǵy zamanaýı qazaqstandyq mádenıet», «Qazaqstandaǵy 100 jańa esim» jobalary boıynsha alty baǵytta jumys isteıtin bolady. Oǵan qosa «Týǵan jer» baǵdarlamasyn júzege asyrý maqsatynda Basqarý keńesi, Sarapshylar keńesi jáne hatshylyq qurylyp, jumys isteýde.
Baıandamashynyń sózine súıensek, «Týǵan jer» baǵdarlamasynyń aıasynda óńirlik is-sharalar jospary ázirlengen. Onyń ishinde «Meniń Jetisýym» jerles kásipkerlerdiń aımaqty qoldaý oblystyq forýmy, «Jetisýdyń jeti keremeti» tańdaýly tarıhı-mádenı, ólketaný ekspedıtsııasy, túrkitildes memleketter ókilderiniń qatysýymen «Ulttyq kod jáne latyn álipbıi» taqyrybynda halyqaralyq ǵylymı praktıkalyq konferentsııasy, «Jetisýdyń jastarǵa tartýy», bilim berý uıymdaryna fakýltatıv esebinen «Týǵan ólke tarıhy jáne Ólketaný» pánin engizý boıynsha jumystardy jandandyrý, «Jetisýdyń ádebıet aıdyny» atty oblystyń aqyn-jazýshylarmen kezdesýi jáne basqa da sharalar qarastyrylǵan. Sondaı-aq jaqyn arada arnaıy ınternet-portal, óńirlik jobalardyń ınteraktıvti kartasy, qoldaýǵa muqtajdardyń kartasy, eriktiler korpýsy qurylatyn bolady.
"Bolashaq búginnen bastalady degendeı, Memleket basshysy bizdiń aldymyzǵa keleshekke baǵyttalǵan úlken mindetter júktep otyr. «Bolashaqqa baǵdar: rýhanı jańǵyrý» maqalasy sonyń aıqyn kórinisi. Búgingi kúni baǵdarlamalyq maqalanyń negizgi sharttaryna súıene otyryp, nátıjege maqsatty da sapaly jumys isteýimiz qajet. Osyǵan oraı óńirlik komıssııanyń jáne jumys toptarynyń múshelerine, aýdan, qala ákimderi men basqarma, departament basshylaryna josparlanǵan is-sharalardy sapaly ári ýaqytynda oryndaýdy tapsyramyn", - dedi A. Batalov.
Sóziniń sońynda oblys basshysy atqarylǵan jumystardyń barysyn Óńirlik komıssııanyń otyrysynda turaqty qadaǵalap otyratynyn jetkizdi.
