Meniń Týym, meniń Otanym: Aqmola oblysy patrıottyq aktsııaǵa ún qosty
KÓKShETAÝ. QazAqparat - Aqmola oblysynyń aýyldarynda Qazaqstan Respýblıkasy Táýelsizdiginiń 30 jyldyǵyna arnalǵan «Meniń Týym, meniń Otanym» patrıottyq chellendji ótip jatyr, dep habarlaıdy QazAqparat tilshisi.
Áleýmettik jelide tarap jatqan beınejazbadan Zerendi aýdany Igilik aýylynyń bir top qazaq jigitteri aqsaqaldyń aq batasyn alyp, salt atpen elimizdiń kók baıraǵyn jelbiretip kele jatqanyn kórýge bolady.
Salt atylardyń sońynan ilese jol talǵamaıtyn kólik kók týmen júrip keledi.
Al kelesi beınejazbada qolyna kók tý ustaǵan Sáýle aýylynyń jigitteri saıyn dalada tulparlaryn josyltyp, qumaıyn júgirtip keledi.
«Táýelsizdiktiń 30 jyldyǵyna arnalǵan «Meniń Týym, meniń Otanym» chellendjin jalǵastyramyz. Keńaşy aýyly joldaǵan chellendjdi Sáýle aýyly qabyl alyp, kórshiles Qudyqaǵash aýylyna tapsyramyz», - deıdi Sáýle aýylynyń jigitteri.
Jeli qoldanýshylary da aktsııaǵa qatysýshylarǵa qoldaý bildirip, jyly lebizin jazdy.
Býrabaı aýdanynda bastaý alǵan «Meniń Týym, meniń Otanym» patrıottyq aktsııasyna oblystyń birqatar aýdandaryndaǵy aýyldar atsalysyp jatyr.
