Meniń teatrdaǵy eń súıikti rólim - «Qaragóz» - Zámzágúl Sháripova
ALMATY. 31 qazan. QazAqparat /Erlik Erjanuly/ - Ábdildá Tájibaevtyń "Kóńildester" pesasyndaǵy birinshi rólimdi oınaǵanda maǵan áıgili jazýshymyz Muhtar Áýezov "Zámzám-káýsar" degen at berdi.
Bul jaıly QR Halyq artısi Zámzágúl Sháripovanyń 29 qazan kúni Almatydaǵy Qazaqtyń M. Áýezov atyndaǵy akademııalyq drama teatrynda ótken 80 jyldyq mereıtoılyq keshinde aıtyldy.
"Zámzám-káýsar" degen bul at meni kóp kóterip tastady. Keıin "Qaragózdi" daıyndap júrgende de Muqań bilmegenimdi túsindirip, aqyl-keńesin berip júrdi. Alaıda ol kisi ony kóre almaı ketti. Rahııa apaı Muqań Máskeýge operatsııa jasatýǵa bara jatyr eken. Qoshtasýǵa bara jatyrmyn degende men de úıine ilesip barǵan edim. Muqań onda syrqat adamǵa múlde uqsamaǵan bolatyn. Biraq sol sapardan oralmady", - deıdi Zámzágúl Núsipbaıqyzy.
Teatr sahnasynda 100-den astam qoıylymda oınaǵan áıgili óner sańlaǵynyń aıtýynsha, onyń eń súıikti róli "Qaragóz" beınesi. Ol osy rólimen QR Halyq artısi atanyp, teatrtanýshy ǵalymdardyń joǵary baǵasyn alyp, jurtshylyqtyń ystyq yqylasyna bólendi. Qazaqtyń M. Áýezov atyndaǵy akademııalyq drama teatrynda 1952 jyldan beri jumys jasap kele jatqan Z. Sháripova kıno ónerinde de ózindik qoltańbasyn qaldyryp, dýblıaj ben kórkem sóz oqý salalarynda da eren eńbegimen halyqtyń súıispenshiligine bólengen san qyrly óner ıesi.
