Meniń sporttyq jolym áskerden bastaldy - Olımpıada chempıony S.Sápıev
ASTANA. 4 qazan. QazAqparat - Búgin Astanadaǵy Otan qorǵaýshylar alańynda bıyl áskerge shaqyrylatyn jastarǵa arnalǵan patrıottyq jıyn ótti.
Oǵan London Olımpıadasynyń chempıony Serik Sápıev qatysty.
Saltanatty shara «Otan qorǵaýshylar» monýmentine gúl shoqtaryn qoıý rásiminen bastaldy. Osydan keıin jıynǵa qatysýshylar surapyl soǵystarda qurban bolǵan qazaqstandyq jaýyngerlerdi bir mınýt únsizdikpen eske aldy. Al resmı bólim bitken soń, jastar desantshylardyń qoıan-qoltyq urystaryn kórip, respýblıkalyq ulan sarbazdarynyń sap túzeý qımyldaryn erekshe ynta-yqylaspen tamashalady. Іs-shara aıasynda qarý-jaraq kórmesi uıymdastyryldy. Al arnaıy áskerı shatyrda jastar sarbaz botqasynyń dámin tatyp kórdi.
Astanadaǵy patrıottyq jıynǵa London Olımpıadasynyń chempıony Serik Sápıev te qatysty. Ol óziniń sporttyq jolyn ásker qatarynan bastaǵan eken. «Men áli kúnge deıin ásker qatarynda júrmin. Qazir kelisimshart boıynsha jumys istep jatyrmyn. Ózim úshin ásker - bul naǵyz ómir mektebi, adamnyń sporttyq rýhyn kóteretin orta. Negizi, meniń sporttyq jolym ásker qatarynan bastaldy. Áli esimde, sarbaz bolyp júrgen kezde, san alýan jarystarǵa qatystym. Onyń arqasynda alǵash ret Álem chempıonatyna joldama utyp alǵanym bar. Meniń sporttaǵy jetistikterim mine, osydan bastaldy», - deıdi S.Sápıev.
