Meniń keıipkerim shynaıylyǵymen erekshelenedi- Sanurjan Súleımenov
ASTANA. QazAqparat - Astanada tusaýkeseri ótken «Altynshy beket» fılminde basty róldi oınaǵan akter Sanurjan Súleımenov «QazAqparat» HAA tilshisine týyndy týraly pikirin aıtyp berdi.
«Osy róldi sátti alyp shyqtym ba, joq pa - buny kórermenniń ózi shesher. Menińshe, men ǵana emes 2 aı boıy tolaǵaı eńbek etken túsirilim toby ózine júktelgen mindetti oryndady degen úmittemin. Bizdiń fılm árbir kórermenniń júreginen oryn tabar degen senimdemin», - deıdi akter.
Sanurjan Súleımenovtiń aıtýynsha, fılm 15 naýryzdan bastap kórsetiledi.
«Eń aldymen - bul bizdiń tarıh. Bizdiń beıbit kúnniń batyrlary, ózine júktelgen mindetti adal atqaryp júrgen adamdar týraly túsirilgen týyndy. Bizdiń batyr - ádette fılmde tolyp jatqan sýperbatyrlardan ómirdegi shynaıylyǵymen erekshelenedi. Ekinshiden, búgingi tańda biz otandyq kınoǵa qoldaý bildirýimiz kerek dep esepteımin. Bizdiń fılm qatardaǵy komedııa emes, onyń ıdeologııalyq mańyzy bar», - deıdi ol.
Akterdyń sózine sensek, ol buryn da bir áskerı rólde oınap kórgen. Alaıda ol kezde áskerı ómirdiń qyr-syryn tolyq meńgerýge múmkindik bolmaǵan.
«Ol fılmdegi laqap atym «Polkovnık» boldy. Biraq, shynaıy áskerı róldi men birinshi ret oınap otyrmyn dep aıtýyma bolady. Árıne, osy keıipker (Erbol Otarbaev - avt.) maǵan óte úlken tárbıelik áserin berdi. Shyny kerek, ýaqyt az boldy. Degenmen, osy aralyqta keıipkerdiń rólin barynsha bere bilýge tyrystym. Osy keıipkerge kóleńke túsirmeı, shynaıy batyr beınesin kórsetýge barymdy saldym. Sarbazdarmen bir kazarmada jatyp, áskerı ómirdi kórdim», - deıdi Sanurjan Súleımenov.
Eske sala ketsek, búgin Elordadaǵy «Qazaqstan» kontsert zalynda Ulttyq ulan jaýyngerleriniń qaısarlyǵy men Erbol Otarbaevtyń erligi týraly túsirilgen «Altynshy beket» fılminiń tusaýkeseri ótti.
