«Meniń Qazaqstanym, meniń jerim» taqyrybynda ótken respýblıkalyq baıqaýdyń qorytyndysy jarııalandy
ASTANA. Qazannyń 23-i. QazAqparat. /Aıdyn Báımen/ Búgin Astana qalasyndaǵy «Dýman» meımanhanasynyń májilis zalynda «Meniń Qazaqstanym, meniń jerim» taqyrybynda ótken respýblıkalyq baıqaýdyń qorytyndysy jarııalanyp, jeńimpazdardy marapattaý rásimi ótti,
dep habarlaıdy QazAqparat.
Bul baıqaýdy Qazaqstan Respýblıkasynyń Mádenıet jáne aqparat mınıstrligi men Astana qalalyq Іshki saıasat basqarmasy uıymdastyrǵan. Sonymen qatar «Sotsıým-Astana» úkimettik emes uıymynyń atsalysýymen ótip otyr.
Baıqaýǵa jasy 14-ten 29-ǵa deıingi jazýshylar men aqyndar qatysty. Jas talanttardyń baıqaýyádebı shyǵarmashylyqty qoldaýǵa jáne damytýǵa baǵyttalǵan.Baıqaýdyń maqsaty- jas jazýshylar men aqyndardyń kásibı sheberligin ósirý, eń úzdik shyǵarmalardy jarııalaý. Buǵan deıin baıqaý aımaqtar boıynsha ótkizilgen.
Búgingi basqosýda ádilqazylar alqasynyń tóraǵasy, memleket jáne qoǵam qaıratkeri, fılologııa ǵylymdarynyń doktory Myrzataı Joldasbekov osyndaı baıqaýlardyń ótkizilýi jas daryn ıelerine jasalǵan qoldaý bolyp tabylatynyn aıtty. «Sizder baqytty jastarsyzdar. Elimiz táýelsizdik alǵannan keıin ósip jetilip, jańa qoǵamda ómir súrip jatyrsyzdar. Keleshekte memleketti basqarý sizderdiń qoldaryńyzǵa ótedi. Astana - sizderdiki. Aǵa urpaq ómirdiń kóp qıyndyqtaryn kórdi. Sizder ondaıdy kórmeńizder. Ádilqazylar jas daryndardyń qaýlap ósip kele jatqanyna shyn júrekten qýandy»,- dedi Myrzataı Joldasbekov.
Ádilqazylar alqasynyń músheleri aqyn Nurǵoja Oraz ben jazýshy Ákim Tarazı jas talapkerlerge izgi tilekterin arnady.
Osy baıqaýǵa elimizdiń ár óńirinen poezııalyq jáne prozalyq shyǵarmalar jazatyn 100-den astam talapkerler qatysqan. Baıqaýdyń birinshi kezeńiniń qorytyndysy boıynsha bas júldeni povesi men birneshe áńgimeleri úshin Jámıla Aıazbekova jeńip aldy. Ol qazir Ulybrıtanııada «Bolashaq» baǵdarlamasy boıynsha oqyp júr. Ekinshi oryndy jas aqyn Gúlnáz Myrzaǵalıeva ıelendi. Patrıottyq óleńderi úshin Dmıtrıı Larıonov úshinshi júldege ıe bolsa, Áıgerim Amanjolova yntalandyrý syılyǵyn aldy.
Sonymen qatar elimizdiń barlyq oblystary boıynsha jeńimpazdar anyqtalyp, olarǵa da júldeli oryndar berildi.
Sol sekildi respýblıkalyq baıqaýdyń ekinshi kezeńi boıynsha birinshi oryndy Abylaı Madýanov ıelendi. Ekinshi oryn Manarbek Qarekenovke, úshinshi oryn Gúlmıra Jýsanbaevaǵa tabys etildi. Jáne de bes talapty jas yntalandyrý syılyqtarymen marapattaldy. Bul jastar negizinen óz óleńderimen qatysqan.
