Meniń ǵana jolym durys deıtinder dástúrli ıslamǵa orala bastady - Bas múftı
«Qazaqstan musylmandary dinı basqarmasy radıkaldy, destrýktıvti teris aǵymdarmen jumysty belsendi júrgizip kele jatyr. 2017 jyly destrýktıvti kózqarastan keri qaıtqan, sanaly túrde ózimizdiń dástúrli ıslam tanym-túsinigimizge oralǵan myńǵa tarta azamattyń atyn da aıta alamyz. Bul óz kezeginde nátıjeli jumys bar ekenin bildiredi. Biz osy júıeli jumysty jasaý baǵyttarynda belsendilik tanytpaǵan óńirlermen, meshittermen jańa jumys júıesin bastap kelemiz»,- dep atap ótti Bas múftı Parlament Májilisinde.
Budan buryn habarlanǵandaı, búgin Májiliste «QR keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý» týraly zań jobasyn tanystyryldy. Osy oraıda zań jobasyna alǵash ret «destrýktıvti dinı aǵym» jáne «dinı radıkalızm» sııaqty uǵymdardyń zańdy anyqtamasy engizilip otyr.
«Destrýktıvti dinı aǵym» jáne «dinı radıkalızm» máselesi qoǵamda asa mańyzdy. Bizdiń bolmysymyzdy, dástúrimizdi, mádenıetimizdi, ıaǵnı barsha qundylyǵymyzdy joqqa shyǵaratyn túsinik kózqaras bolsa, demek ol - destrýktıvtiń anyqtamalyǵy. Al endi tek «meniń ǵana jolym durys, basqanyń barlyǵy dinde emes, musylman emes» dep jurshylyqty ashyq aıyptaıtyn bolsa, onda ol - radıkaldy kózqaras. Demek, osyndaı jaqtaryn negizge ala otyryp, dinı qyzmetimizdiń jumysynda kóp jeńildik tanytady dep oılaımyn», - dep túıindedi sózin Serikbaı qajy Oraz.
