Meniń de jaýapkershiligim bar – Tileýhan Ábildaev dárigerlerdiń koronavırýs juqtyrýyna qatysty
ALMATY. QazAqparat - Almaty qalalyq Qoǵamdyq densaýlyq basqarmasynyń basshysy Tileýhan Ábildaev Ortalyq qalalyq klınıkalyq aýrýhana qyzmetkerleriniń jappaı koronavırýs juqtyrýyna qatysty pikir bildirdi, dep habarlaıdy QazAqparat tilshisi.
«Men dárigerlerdi aıyptaı almaımyn. Alaıda, eger qaýipsizdik sharalaryn durys saqtansa, qyzmetkerler jappaı juqtyrmas edi. Bul - qalamyzdaǵy iri aýrýhanalardyń biri. Munda kóbinese patsıentter shuǵyl jetkiziledi. Bizde naýqastardyń kópshiligi koronavırýspen aýyrǵany belgisiz ótti. Soqyrishek, pankreatıt, holetsıstıtpen aýyryp túsken naýqastardy COVID-19 juqtyrǵandardan ajyratý múmkin bolmady. Shuǵyl statsıonar jaǵdaıynda jumys istep júrgen qyzmetkerler juqtyrýy múmkin. Bul jaǵdaıda mindetti túrde tereń epıdemıologııalyq tekserý júrgizilýi tıisti. Sosyn qala ákiminiń orynbasary Erjan Babaqumarov bastaǵan komıssııa sheshim shyǵarady», - dedi T.Ábildaev.
Onyń aıtýynsha, qazir qaladaǵy barlyq aýrýhanalar men emhanalar provızorlyq emhana rejıminde jumys istep jatyr. Basqarma basshysy bul oqıǵaǵa óziniń de jaýapty ekenin jetkizdi.
«Men basqarma basshysy retinde ózimniń de jaýapty ekenimdi bilemin», - dedi ol.
Onyń aıtýynsha, mundaı oqıǵa álemniń barlyq elderinde bolyp jatyr.
«Qazir bul ınfektsııanyń óte juqpaly ekendigin Qazaqstanda ǵana emes álem boıynsha kórip otyrmyz. Tipti damyǵan elderde jaı adamdardyń da, medıtsına mamandarynyń da arasynda juqtyrý tirkelip jatyr. Biz ózimizge qajetti tájirıbe jınap jatyrmyz. Bolashaqta bul basqa ınfektsııalarmen kúreste septigin tıgizbek. Meniń oıymsha, bizdiń dárigerlerdiń biliktiligi arta túsedi», - dedi Tileýhan Ábildaev.
