Meniń barlyq kúsh-jigerim, tájirıbem, aqyl-oıym Qazaqstan halqyna qyzmet eteýge arnalatyn bolady-N. Nazarbaev
ANA. 4 sáýir. QazAqparat /Qanat Mámetqazyuly/ - Meniń barlyq kúsh-jigerim, meniń tájirıbem, meniń aqyl-oıym Qazaqstan halqyna qyzmet etýge arnalatyn bolady. .
3 sáýirde ótken QR Prezıdentiniń kezekten tys saılaýynda Memleket basshysynyń jeńiske jetýine baılanysty búgin Astanadaǵy «Qazaqstan» sport kesheninde ótken «Elbasymen birge, alǵa!» atty forýmda Prezıdent Nursultan Nazarbaev osylaı málimdedi.
«Sizderge, sizder arqyly barlyq qazaqstandyqtarǵa saılaýda maǵan kórsetken joǵary senimderińiz úshin alǵys aıtamyn. Meniń barlyq kúsh-jigerim, meniń tájirıbem, meniń aqyl-oıym Qazaqstan halqyna qyzmet etýge arnalatyn bolady. Árqashan osylaı bolǵan jáne solaı bola beredi de», - dedi N. Nazarbaev.
Elbasy óziniń saılaýaldy shtabtary elimizdiń barlyq aımaqtarynda jumys istegenin atap kórsetti. «Shtabtardyń árbir aýylda, árbir aýdanda, árbir qalada jumys istegenin bilemin. Osy saılaýda jeńiske jetýime kómekteskenderdiń barlyǵyna úlken rahmetimdi aıtamyn. Bul meni kóp nársege mindetteıdi. Saılaýshylardyń 90 paıyzdaıynyń saılaýǵa qatysýy jáne 90 paıyzdan astamynyń meni qoldaǵandary Batys elderi úshin - sensatsııa. Ádette Prezıdent saılaýy halyqty, eldi ártúrli partııalyq bloktarǵa bóletin bolsa, biz birige alatynymyzdy kórsettik. Álemniń ár túpkirinde qantógister, ulttar arasyndaǵy janjaldar bolyp jatyr. Biz, Qazaqstannyń barlyq ulttary men ulystary, barlyq dinderi birtutaspyz. Keıbir elderde jumys oryndaryn qysqartylyp, zaýyttar toqtatylýda, al biz zaýyttardy turǵyzyp, jańa jumys oryndaryn qurýdamyz. Keıbir elderde zeınetaqylar qysqartylyp jatsa, biz ony ulǵaıtýdamyz. Keıbir elderde aılyq jalaqy qysqartylýda, biz ony ulǵaıtýdamyz», - dedi N. Nazarbaev.
.
