«Meniń armanym» televızııalyq shoýy elimizdiń barlyq aımaqtaryn qamtıtyn bolady
ASTANA. QazAqparat - Elimizde jastar arasynda «Meniń armanym» atty áleýmettik jobalardyń ulttyq baıqaýy jarııalandy. Atalmysh baıqaý jeńimpazy 5 mıllıon teńge ıelenedi.
«Meniń armanym» baıqaýy áleýmettik biregeı mańyzy bar jáne jas jańashyldardyń jalpyǵa paıdaly bastamalaryn anyqtamaq, Al onyń negizgi maqsaty - qazaqstandyq jastardyń áleýmettik belsendiligin, synı oılaý jáne áleýmettik-shyǵarmashylyq qabiletterin anyqtaý jáne damytý, zııatkerlik áleýetin jetildirýge múmkindik jasaý.
Sonymen birge atalmysh baıqaý jastardaǵy synı oılaý fılosofııasyn dáripteýge baǵyttalǵan bilim berý úderisterine járdemdesý jáne qazirgi álemdi bútindeı qabyldaý, máselelerdi sheshýdiń balamaly joldaryn kóre bilýlerin damytý, jańa ıdeıalardy týdyra bilý qabiletterin, stereotıpterdi jeńý, bógde paıymdaýlardy durys baǵalaý jáne óz ustanymynda dáleldi túrde turaqtaý fılosofııalaryn dáripteýge baǵyttalǵan protsesine qoldaý tanytý, qazaqstandyq jastardyń nazaryn qoǵamdaǵy áleýmettik ózektiligi basym máselelerin sheshýge tartý, jobalardy ázirleý jáne iske asyrý boıynsha jastardyń áreketterine qoldaý tanytý jáne yntalandyrý, áleýmettik jobalaýdyń tıimdi tájirıbesin taratý syndy mindetterdi sheshýdi kózdeıdi.
Aıta ketý kerek, «Meniń armanym» jobasy N.Á. Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynyńda kórsetilgen ıdeıanyń is júzinde iske asyrýy bolyp tabylady jáne de «Rýhanı jańǵyrý» Baǵdarlamasynyń qoldaýymen ótkiziledi.
Baıqaýǵa 14 pen 29 jas arasyndaǵy qazaqstandyqtar: orta mekteptiń joǵarǵy synyp oqýshylary, kolledj pen proftehnıkalyq mektep oqýshylary, úkimettik emes uıymdar ókilderi, JOO-nyń stýdentteri, jas jańashyldar qatysa alady. Baıqaý 20 shilde men jeltoqsan aıynyń 31 juldyzyna deıin jalǵasady, al qatysýshylardyń ótinimderi 20 shilde men 1 qyrkúıek aralyǵynda baıqaýdyń www.meninarmanym.kz resmı saıtynda qabyldanady.
Condaı-aq, portalda jarııalanǵan sharttarǵa nazar aýdaratyn bolsaq, kún tártibindegi máselelerdi sheshýde aıryqsha usynystardy qamtıtyn biregeı, qatysýshynyń aınalasy, otbasy, aýyly, qala, tipti eline paıdaly jáne bolashaqta demeýshilerdiń qoldaýyna táýeldi bolmaıtyn, ıaǵnı ózin ózi qarjylaı qamtamasyz ete alatyn turaqty damý úlgisinde jasalǵan joba jeńimpaz bolýǵa ábden laıyq.
Aıta ketetin taǵy bir jaıt, baıqaýǵa qatysý tegin. Respýblıkamyzdyń kez-kelgen aımaǵynda turatyn jas qazaqstandyq óz jobasyn negizgi bes baǵyt boıynsha joldaı alady. Atap aıtsaq, olar: aqparattyq, bilim, tehnologııalyq, ekologııa jáne áleýmettik-mádenı baǵyttar. Uıymdastyrýshylardyń sózine súıinsek, biregeı ári qoǵamǵa paıdaly áleýmettik joba usynǵan úmitker júldeger bolyp tabylady. Qazaqtan Respýblıkasynyń áıgili qoǵam qaıratkerleri, saıasatkerler men kásipkerlerden quralǵan qazylar alqasy 1 aı boıy kelip túsken jumystardy saralap, joba jeńimpazyn anyqtaıdy. «Meniń armanym» baıqaýynyń aqtyq kezeńi teledıdarlyq áleýmettik- zııatkerlik shoýdan turatyn bolady. Aqtyq jarysqa qatysýǵa eń úzdik 64 jobanyń avtory Astana qalasynda jınalady.
Sonymen qatar, «Habar» arnasynda osy jobaǵa qatysty 22 túsirilim júzege asyrylady, ıakı "Meniń armanym" televızııalyq shoýy elimizdiń barlyq aımaqtaryn qamtıtyn bolady.
Aıta ketý kerek, baıqaýdyń uıymdastyrýshysy - «SUCCESS K» strategııalyq kommýnıkatsııalar agenttigi.
