«Meniń armanym» atty jastar konkýrsynyń jeńimpazy 5 mıllıon teńgege ıe bolady
ASTANA. QazAqparat - Uıymdastyrýshylar «Meniń armanym» jobasyna qatysýǵa múmkindik alǵan qabiletti jastar áleýmettik ınnovatsııalardy usyna alatynyna senimdi. Qyrkúıekte bastalatyn ıntellektýaldyq shoý jeltoqsan aıynda sońyna jetedi, dep habarlaıdy «QazAqparat» HAA tilshisi.
Respýblıkalyq «Meniń armanym» jobasy 20 shildeden 31 jeltoqsanǵa deıingi aralyqta ótkiziledi. Intellektýaldyq jarysqa Qazaqstannyń barlyq aımaqtarynan 14-29 jas aralyǵyndaǵy jastar qatysýyna bolady. «Meniń armanym» jastar arasyndaǵy áleýmettik jobalar Ulttyq baıqaýynyń jeńimpazy 5 000 000 teńgeni ıelenedi.
«Joba barysynda oqý trenıngteri ótkiziledi. Qyrkúıekte 64 jobanyń avtory Astanaǵa kelip, televızııalyq baǵdarlamaǵa túsýge ázirlenedi. Avtorlar jobalaryn qalaı qorǵaıdy, qalaı sóıleý kerek, qalaı jobany tanystyrý kerek - bárin de úıretemiz. Jeltoqsanda aqtyq saıys ótedi. 4 avtordyń jobasy iriktelip, onyń ishinde bireýi jeńimpaz atanady», - deıdi «SUCCESS K» strategııalyq kommýnıkatsııalar agenttigi bas dırektory Lázzat Kókkózova.
«Meniń armanym» baıqaýynyń aqtyq kezeńi teledıdarlyq áleýmettik- zııatkerlik shoýǵa ulasady. Jobalardy Qazaqtan Respýblıkasynyń beldi qoǵam qaıratkerleri, saıasatkerleri men kásipkerlerinen quralǵan qazylar alqasy baǵalaıtyn bolady.
«Jobalar óte kóp. Bári de ártúrli. Al mundaı jobaǵa tyń qadam jasalyp otyr. «Meniń armanym» konkýrsy arqyly qabiletti jastarǵa óz-ózderin tanytýǵa tamasha múmkindik týyp otyr», - deıdi «Rýhanı jańǵyrý» baǵdarlamasynyń basqarma keńsesiniń basshysy Arman Evnıev.
