«Meniń ákem» baıqaýy: Sahnaǵa shyqqan ákeler kózine jas aldy
«Ár otbasyndaǵy ákeniń rólin naqtylap, onyń bedelin kóterý baǵytynda jumys isteýimiz kerek. Sebebi qoǵamda bolyp jatqan kóp problema ákege tikeleı qatysty. Balaǵa kóńil bólmeı, tárbıeni tek anasyna júkteý de qatelik. Anasy otaǵasyn qoldap, sońǵy sheshimdi ákege qaldyrýdy da umytpaǵan jón», - dedi oblys ákiminiń orynbasary Marat Toǵjanov.
Aıta keteıik, Qazaqstanda 4 myńǵa jýyq úkimettik emes uıym bar. Onyń 300-i otbasy isterine, onyń ishinde bala men anany qorǵaýǵa baǵyttalǵan.
«Bul áleýmettik joba Aqtóbede ǵana qolǵa alyndy. Sondyqtan joba aıasyn keńeıtip, jyl boıy jumys isteýge shaqyramyz. Otbasynyń tiregi, ataq-abyroıy, aıbary - ákeniń róli qashanda bólek. «Áke úlgisin kórmese, ul jarytyp as bermes» degen sóz bar. Bári ózimizge baılanysty», - dedi ádilqazylar múshesi Aıshýaq Dármenuly.
Baıqaý kezinde Temir, Qarǵaly, Alǵa aýdandarynyń ákimdigi men jergilikti kásipkerler demeýshilik kórsetti. Sonymen qatar, aqtóbelik tilshiler de qoldaý bildirdi. 
«Kóp bala tárbıelep, báıterekke aınalǵan ákelerimiz bizge úlgi. Jastar materıaldyq jaǵyn oılap, ózderine shekteý qoıady. Al 10-15 bala baǵyp, ósirip, tárbıe bergen ákelerdi kórgende olar óz oılaryn ózgertedi degen senim bar», - dedi joba jetekshisi, jýrnalıst Jańalyq Ahash.
«Batyr áke» nomınatsııasynda Esqýat Qoshamanov pen Qaıyrhan Shamshın erekshe qurmetke ıe boldy. Esqýat Qoshamanov 12 bala tárbıelep otyrǵan kezde jubaıy kóz jumǵan. Keıin qaıta otaý quryp, 15 balany jetildirdi. Sahnaǵa shyqqan batyr áke alǵysyn bildirip, kózine jas aldy.
Al «Qamqor áke» atalymynda múmkindigi shekteýli balalardy baǵyp otyrǵandar marapattaldy. «Hanshaıymdar ákesi» nomınatsııasyna ádettegideı kóp otbasy ótinish bildirgen. Barlyǵy 22 otbasyǵa alǵys hat pen estelik syılyq tabys etildi. Budan bólek, «Muǵalim aǵaı» men «Meıirimdi áke» nomınatsııalaryna qatysqan ár ákege alǵys hat pen shıpajaıǵa joldama berildi.
