«Meni jeńýi ekitalaı»: Ivan Dychko Entonı Djoshýany jekpe-jekke shaqyrdy
Habarlanyp otyrǵandaı, 1 maýsym kúni Djoshýa «Madison Square Garden» sport kesheninde AQSh-taǵy debıýttik kezdesýin ótkizedi. Alaıda jýyqta onyń qarsylasy Djarell Mıllerdiń (23-0-1, 20KO) dopıng-testten ótpeı qalǵany anyqtalǵan edi. Jaqyn arada Nıý-Iorktegi Atletıkalyq komıssııada Mıllerdiń isi qaralady. Boljam boıynsha ol sporttan belgili bir merzimge shettetilýi múmkin. Al Djoshýanyń komandasy ázirge qarsylasty tańdaý nusqalaryn qarastyratyn emes.
Óz kezeginde Dychko Mıllerdiń ornyna sharshy alańǵa shyǵýǵa daıyn ekenin bildirdi. 2012 jyly Londonda ótken Jazǵy Olımpıada oıyndarynda Djoshýa jartylaı fınalda qazaqstandyqty utyp, «altyn» medal ıelengen edi.
«Djoshýa meni sol kezde uta almaǵanyn jaqsy biledi. Qazir de meni jeńýi ekitalaı. Ol sol kezde (Londondaǵy Olımpıadada - avt.) óz Otanynda tóreshilerdiń sheshimimen meni utyp, altyn medalge ıe boldy. Endigi kezekte meni shynymen de jeńgenin dáleldeý úshin oǵan jaqsy múmkindik týyp otyr. Kezinde oǵan jeńis syıǵa tartylyp ketken. Al men qazir naǵyz babymdamyn», - deıdi Dychko.
Ivan Dychkonyń aıtýynsha, Djoshýa burynǵy kúıinde qalǵan.
«Ol ár kezdesýinde basynan birshama soqqy alady. Keıin kúshtiligimen qarsylasyn eńserip ketip júr. Qysqasy, men ony qalaı jeńý kerektigin jaqsy bilemin. Ony bir kezderi jasaǵanmyn da. Entonıden jaýap kútemin», - deıdi qazaqstandyq boksshy.
Eske sala ketsek, Olımpıada oıyndarynyń eki dúrkin qola júldegeri Ivan Dychko (7-0, 7 KO) kásipqoı bokstaǵy kelesi jekpe-jegin 1 naýryz kúni AQSh-ta ótkizetini buryn da habarlanǵan edi. Málim bolǵandaı, jekpe-jek Florıda shtatynyń Hollıvýd qalasyndaǵy Seminole Hard Rock Hotel and Casino kesheninde ótedi. Ázirge qazaqstandyqtyń qarsylasy belgisiz.