«Meni úıińe alyp ket»: Elordada janýarlardyń fotokórmesi ótip jatyr
ASTANA. QazAqparat - Elordadaǵy eńseli oıyn-saýda ortalyqtardyń biri MEGA Silk Way-de ıesiz ıtterge arnalǵan «Meni úıińe alyp ket» atty fotokórme ashyldy, dep habarlaıdy QazAqparat tilshisi.
Kórmeniń maqsaty - adamdarǵa ıtterdi asyraý qaýipti emes ekenin túsindirý, óıtkeni olardyń árqaısysy zardap shekken, vaktsınatsııalanǵan.
«Bul is-sharanyń basty maqsaty - árbir ıttiń ıesin tabýy bolyp otyr. Kórmeniń barysynda maǵan kún saıyn habarlasyp, ıt nemese mysyqty asyrap alǵysy keletin adamdardyń qońyraýlar shalyp jatqanyn aıtqym keledi. Ókinishke qaraı, adamdardyń tolyǵymen jaýapkershilikti sezine bermeıdi. Óıtkeni, Siz ıtińizben sál oınap, kóshege qaıta qańǵytyp jiberetin adamǵa beremeýińiz kerek», - dedi «AstanaVetServıs» KMK dırektory Danııar Abdýlov.
Ol óz sózinde barlyq úı janýarlary ornalastyrylǵan tálimbaq baryn atap ótti.
«Kún saıyn bizge kem degende 10 ıt jetkiziledi. Demek, tálimbaqtyń da sany kún sanap artyp kele jatyr degen sóz. Alaıda olardy asyrap alý jaǵy asa qarqyndy emes», - deıdi Danııar Abdýlov.
Sonymen birge, ol jańa tálimbaqtyń qurylysy úshin qaladan 4 ga aýmaq bólingenin tilge tıek etti. Jospar boıynsha kelesi jyly jańa tálimbaq ashylyp qalýy kerek. Ol mamandandyrylǵan HQO jaqta ornalasatyn bolady.
«Aýlaýǵa stop» eriktiler qozǵalysy dırektorynyń orynbasary Inna Panchenko osy rette kórme uıymdastyrý jumysy burynnan josparlanyp júrgenin aıtty.
«Kóshedegi ıtterden úreılenýdiń eshqandaı qajeti joqtyǵyn adamdar túsinýi kerek. Saıyp kelgende ıtterdiń ózderi adamdardan artyq jasqanshaq keledi. Eger ıtke kómektese almasańyz - joq degende qorlaýǵa jol bermeýge tyrysyńyz. Tamaq berińiz nemese janynan ótip ketińiz. Kez kelgen adam bizdiń tálimbaqqa kelip ıtterdi alyp kete alady», - dedi Inna Panchenko.
Onyń aıtýynsha, jyl basynan beri 6 ıtti adamdar asyraýǵa alyp ketken.
«Kisilerdiń kóbi «Aýlaýǵa stop» ýaqytsha ustaý ızolıatory týraly bilmegendikten, birlese otyryp jumys júrgizdik. Eger bizge kelip ıtti tegin alyp ketýge múmkindik bolyp tursa, ony basqa jerden satyp alýdyń qanshalyqty qajeti bar. Biraq, áleýetti ıelerine kelgende bizdiń ózimizdiń talaptarymyz bar. Biz eń aldymen ıttiń turatyn oryny bolýy kerektigin eskertemiz. Máselen, bizge 70 jastaǵy bir qart kelip, ıttiń birin alyp berýge mindetti ekenimizdi aıtty. Joq, biz berýge mindetti emespiz. Bul ıtter onsyz da bir kezderi kóshede qaldyrylǵan. Olarǵa biz balalar sekildi qaraımyz. Olar da tiri jan, olar da tirshilik etkisi keledi», - deıdi Inna Panchenko.
Kórmege qatysty fotograf Rýslan Hasanov ta óz oıymen bólisti. Onyń aıtýynsha, kóptegen adamdar ıtke jetkilikti dárejede qaramaıdy. Kúshik kezinde satyp alady da, ósip ketkennen keıin kóshege qoıa bere salady.
«Osy kórmege daıyndyq barysynda ıtterdiń biri de maǵan oǵash minez tanytqan emes. «Aýlaýǵa stop» ýaqytsha ustaý ızolıatorynda olarǵa barlyq jaǵdaı jasalǵan. Osy kórme arqyly biz kez kelgen adamǵa ıtti nemese mysyqty asyrap alǵan kezde jaýapkershilikti seziný kerektigin eskertkimiz keledi. Kóptegen adamdardyń ıttiń ıesine adal dos ekenin esten shyǵaryp bara jatqan sekildi. Meniń tipti ıtterdiń jylaǵan kezderin kórip, kóńilim bosap ketti», - deıdi Rýslan Hasanov.
