«Meni ózińmen alyp ket»: Elordada ıt-mysyqtardyń jármeńkesi ótedi
NUR-SULTAN. QazAqparat – Aldaǵy senbi, 10 tamyz kúni elordadaǵy «Astana» kontsert zaly aımaǵynda ıesiz qalǵan ıtter men mysyqtardyń «Meni ózińmen alyp ket» atty kórme-jármeńkesi ótedi. Bul týraly QazAqparat qala ákimdigine silteme jasap habarlaıdy.
Shara uıymdastyrýshylary - «Nur-Sultan qalasy Qalalyq orta sapasy jáne baqylaý basqarmasy» MM, «Astana vetservıs» KM jáne janaýlardyń quqyǵyn qorǵaıtyn qoǵamdyq uıym ókilderi. Kórme-jármeńke maqsaty – úı janýarlaryna senimdi qojaıyn taýyp, bul máselege azamattardyń nazaryn aýdartý.
Kórme–jármeńkede súıkimdi mysyqtarmen jáne aqyldy ıttermen tanysyp, unaǵanyn úıge alyp ketýge múmkindik bar. Sondaı aq, kelýshilerge ýaqytsha baspanadaǵy ıesiz ózge de janýarlardyń sýretteri usynylady. Olardy Aqsúmbe oramy, 1-úıde ornalasqan ýaqytsha baspanadan alyp ketýge bolady.
Aıta keteıik, mundaı jármeńke elordada ekinshi ret uıymdastyrylyp otyr. Ótken jolǵy shara nátıjesinde qaraýsyz qalǵan 60 ıt pen mysyq jańa ıesin tapty.
Nur-Sultan
qalasynda qańǵybas jáne qaraýsyz qalǵan janýarlarǵa arnalǵan ýaqytsha baspana
2017 jyldan jumys istep keledi. Bul jerdi 700-ge jýyq ıt, 60-tan astam mysyq pana etken. Atalǵan
janýarlardyń barlyǵy karantın, vaktsınatsııalaýdan ótip, búginde mal dárigeri
mamanynyń baqylaýynda.
