Meni izdemeńder: Úıinen ketip qalǵan áıel ózge qaladan tabyldy
KÓKShETAÝ. QazAqparat - Aqmola oblysynyń Birjan sal aýdanynda úıinen ketip qalǵan áıel Nur-Sultan qalasynan tabyldy. Ol óz áreketiniń sebebin aıtýdan bas tartty, dep habarlaıdy QazAqparat tilshisi.
Aqmola oblystyq Polıtsııa departamenti baspasóz qyzmetiniń málimetinshe, joǵalǵan áıel 28 qazanda tabyldy. Ol úıinen shyǵar aldynda «men kettim, meni izdemeńder, barlyǵy úshin keshirińder» degen jazbany qaldyryp ketken.
«Joǵalǵan adamdy izdeýge Birjan sal jáne Býrabaı aýdandarynyń polıtsııa bólimderiniń jeke quramy, jurtshylyq jáne eriktiler baǵyttaldy. Polıtsııa saraı, sharýashylyq ǵımarattaryn, qaraýsyz qalǵan nysandar men qurylystardy qarap, jaqyn mańdaǵy orman alqaptaryn súzip shyqty. Sonymen birge, ýchaskelik polıtsııa pýnktiniń beınebaqylaý kameralarynyń jazbalary zertteldi. Tártip saqshylary joǵalǵan kúni áıel «Stepnıak-Şýche» avtojolyna shyǵyp, jol boıymen Şýche qalasyna qaraı bet alǵanyn anyqtady», - dedi vedomstvodan.
Anyqtalǵandaı, áıel Şýche qalasyna deıin ilespe avtokólikpen jetken, sodan soń keıin taksımen Nur-Sultan qalasyna barǵan.
«28 qazan kúni saǵat 17:00 áıeldiń júrgen jeri anyqtaldy. Ol elordadaǵy týystarynyń úıine barǵan. Áıel úıinen ketý sebebin túsindirýden bas tartty», - dep tolyqtyrdy vedomstvodan.
Aıta ketsek, Aqmola oblysynda iz-túzsiz joǵalǵan áıelge kúıeýi izdeý jarııalaǵan bolatyn.
