Menedjer Sergeı Zavıleıskıı: Fırýzanyń mindeti - álem chempıony bolý
Birinshi bolyp QazAqparat tilshisiniń saýaldaryna Sergeı Zavıleıskıı jaýap berdi.
-Fırýza óziniń qarsylasy retinde nege Svetlana Kýlakovany tańdap otyr? Kýlakova onyń jekpe-jekke shaqyrýyn qabyl aldy ma?
- Svetlana Kýlakova - postkeńestik keńistiktegi eń ataqty ári qyzyqty qarsylas. Fırýzanyń Svetlanaǵa qarsy shyqqany telearnalar úshin kerek bolyp otyr. Naqtyraq aıtqanda, Reseıdegi aldyńǵy qatarly «Match TV» sport arnasy Fırýzanyń dál Svetalanamen qolǵap túıistirgenin qalaıdy. Sport jaǵynan qarasańyz, Fırýza úshin de úzdiktermen rıngke shyqqan qyzyqtyraq. Svetlana Kýlıkovanyń komandasymen aldyn ala kelisim jasaldy. Jaqyn ýaqytta ol jekpe-jek ótedi. Bizdiń taraptan da, olardyń tarapynan da jekpe jekti uıymdastyrýǵa qulshynys bar. Qazirgi ýaqytta máseleniń anyq-qanyǵyp rettep jatyrmyz.
-Fırýza qazaqsha kúresten «Qazaqstan Barysy -2017» týrnırinde sport komentatory retinde «Boks TV» arnasynda tikeleı efırdi júrgizdi. Oǵan bul sala unady ma, bolashaqta kásibı sport komentatory bolǵysy kelmeıdi me?
- Iá, Fırýzaǵa ol unady. Jáne onyń tikeleı efırde komentator retinde bolǵan beıne úzindileri áleýmettik jelilerde tanymal boldy. Kóptegen telearnalar Fırýza Sharıpovany komentator retinde shaqyrar edi, biraq qazirgi ýaqytta onyń buǵan ýaqyty joq. Sebebi, ol qazir chempıondyq jekpe-jekke daıyndalyp jatyr. Al bolashaqta bos ýaqyty bolǵanda ondaı hobbılermen aınalysýy múmkin, onyń aktrısa bolǵysy da keledi. Biraq, qazir eń bastysy - boks.
- Fırýza Sharıpova qysqa ýaqyt ishinde tanymal bolyp úlgerdi. Onyń qoǵamda tanymal bolǵany jeke ómirine kedergi keltirmeıdi me, ol jarnamalarǵa jıi túsedi me?
- Biz qazir bárine úlgere almaıtyn bolǵandyqtan túsirilimderdi saraptap, irikteımiz. Qazirgi ýaqytta jattyǵý protsesinen shyǵyp qalyp júrmiz. Bizdiń maqsatymyz - Qazaqstannan shyqqan qyzdar arasynda birinshi álem chempıony ataný. Osy maqsatta biz jumys istep jatyrmyz. Ony shaqyrǵan jerdiń bárine kelise bersek, bul ony alańdatyp, ýaqytyn alady.
-Sharıpova qazirgi ýaqytta ómirde sporttan basqa nemen aınalysady?
- Fırýzada múldem bos ýaqyt joq. Ol oıana salyp jattyǵýǵa ketedi, sosyn klınıkaǵa baryp, qalpyna keltirý medıtsınalyq sharalaryn qabyldaıdy. Qaıtadan zalǵa qaıtyp kelip, jattyǵýyn jalǵastyrady. Osydan keıin, onyń tek uıqyǵa ǵana ýaqyty qalady. Fırýzanyń kúni osylaı ótip jatyr. Sportta bıik belesti baǵyndyrý úshin barlyǵyn qurban qylý kerek bolady. Fırýzanyń mindeti - álem chempıony bolý. Ol buǵan josparly túrde kele jatyr.
Sportshy qyzdyń fızıkalyq daıyndyǵy týraly onyń bapkeri Sergeı Kýbyshev aıtyp berdi.
-Fırýza Sharıpovanyń qazirgi ýaqyttaǵy fızıkalyq daıyndyǵyn qalaı baǵalar edińiz? Sportshyny babynda ustap turǵan erekshe tásil bar ma?
- Onyń fızıkalyq formasy óte jaqsy deńgeıde. Chempıon bolamyn degen nıeti ony babynda bolýǵa yntalandyrady. Ol chempıon atanýǵa tolyǵymen daıyn.
- Fırýzany ózge sportshylardan erekshelep turatyn qandaı qasıeti bar, onyń symbattylyǵyn, erekshe erik-jigerin aıtpaǵanda? Onyń óz jumysyna degen aıryqsha ádis-tásili bar ma?
- Onyń berilgen tapsyrmany oryndaýǵa degen yntasy men kóńil-kúıi, sondaı-aq úırenýge degen talabyn atap óter edim. Bul kásipqoı boks úshin óte qajet daǵdy. Ondaı qasıetimen ekiniń biri maqtana almaıdy.
- Salamatty ómir salty men sportty nasıhattaý - Qazaqstan qoǵamynyń mindetteriniń biri. Fırýza Sharıpova sportqa qalaı keldi? Sizdińshe, jastardy sportqa qalaı qyzyqtyrýǵa bolady?
-Fırýza sportqa erte jasynan qyzyqqan. Boksqa 10 jasynan kelgen. Al balalardy qalaı sportqa baýlýǵa bolady degen suraqqa aıtarym, - eger bul másele memlekettik saıasattyń nysanaly mindeti bolmasa, ol sheshilmeıdi. Bul jerde sporttyń damýyna bıznesmenderdiń de jappaı qoldaýy qajet. Balalar men jasóspirimderdiń tegin sport mektepteri men sektsııalary bolýy qajet. Memleket deni saý urpaqtyń tárbıesine kóńil bólýi kerek.
-Máskeýge kóshkennen keıin Fırýza ózgerdi me?
- Máskeýge kelgenderdiń barlyǵy ózgeredi. Reseı astanasy Fırýzany sporttyq turǵydan alǵanda ózgertti. Kásibı jaǵynan Fırýza áýesqoı boqstan kásipqoı boksqa aýysty, jekpe-jek ádisterin aýystyrdy. Fırýza ýaqytynyń 99 paıyzyn jattyǵýǵa arnap jatyr. Ol kún saıyn daıyndalady, onyń kúnine eki jattyǵýy bar. Fırýza qazir burynǵydan góri myqty, shydamdy bola tústi. Qazir onyń kásipqoı boksshy retinde talanty ashylyp keledi.
***
Aıta keteıik, Fırýza Sharıpova - 2012 jylǵy Azııa chempıonatynyń qola júldegeri, Qazaqstan chempıonatynyń eki dúrkin jeńimpazy (2012,2013), 2014 jylǵy kúmis, 2016 jylǵy qola júldegeri.