Mendeleev olımpıadasyna 15 qazaqstandyq oqýshy qatysady

Búgin osyǵan oraı baspasóz máslıhatyn ótkizgen Halyqaralyq Mendeleev olımpıadasynyń prezıdenti, M.Lomonosov atyndaǵy Máskeý memlekettik ýnıversıteti hımııa fakýltetiniń dekany Valerıı Lýnın bilim jarysyna Qazaqstan tarapynyń óte joǵary deńgeıde daıyndyq júrgizip jatqandyǵyn atap ótti. Bul olımpıada 15 qazaqstandyq oqýshy óziniń bilim deńgeıin kórsetetin bolady.

«Biz olardyń múmkindikterin óte joǵary baǵalaımyz. Óıtkeni qazaqstandyq oqýshylardyń olımpıadaǵy daıyndyqtary, ásirese, hımııadan óte joǵary ekendigi anyq. Bul bilim jarysynan olar altyn medaldi buǵan deıin de ıelengen bolatyn. Bizdiń ýnıversıtettiń hımııa fakýltetin úzdik bitirgender de bar», - dedi ol.

Onyń atap ótýinshe, sáýirdiń 29-yna deıin jalǵasatyn bilim saıysy úsh kezeńnen ótedi. Bastapqy 2 kezeń teorııalyq bolsa, sońǵysy Nazaraev ýnıversıtetiniń zamanaýı zerthanasynda ótetin eksperımenttik saıys. Berilgen esepterdi sheshý baldyq júıemen eseptelinedi. Máselen, birinshi týrda 80, al qalǵan 2 týrda 75 baldan jınaý kerek. Degenmen esepterdiń óte qıyn bolýynan saıysqa qatysýshylar eń kóbi 170-190 ball ǵana jınaı alady. Al olardyń shyǵarǵan esepterin sol tapsyrmany daıyndaǵan avtor baǵalaıdy.

«Aǵymdaǵy jyly alǵash ret Vengrııa, Frantsııa, Grýzııa elderiniń komandalary qatysqaly otyr», - dedi V.Lýnın

Aıta keteıik, Halyqaralyq Mendellev olımpıadasy jyl saıyn sáýir aıynyń sońy men mamyr aıynyń basynda ótkiziledi. Ol Búkilodaqtyq hımııa olımpıadasynyń zańdy jalǵasy. Onda júldeli oryndarǵa ıe bolǵan oqýshy MGÝ-ge nemese TMD-nyń kez kelgen joǵary oqý  ornyna tegin túse alady.