Meni jumystan shyǵarý qalypty sheshim bolar edi: Sátpaevtyń bapkeri otstavka týraly aıtty
ASTANA. KAZINFORM — Anglııa Chempıonshıpiniń 11-týrynda «Bernlı» óz alańynda «Výlverhemptonnan» 1:2 esebimen jeńilgennen keıin komandanyń bas bapkeri Nıkı Haıen qyzmetinen ketý yqtımaldyǵyna qatysty pikir bildirdi, dep habarlaıdy INFORMSPORTS.
«Bernlıdiń» sátsiz nátıjeleri jalǵasyp keledi. Komanda óz alańynda chempıonat aıasyndaǵy sońǵy 21 matchta jeńiske jete almaǵan. Klýbtyń «Terf Mýr» stadıonynda jeńiske jetpegenine bir jyl boldy.
Bıylǵy maýsymda Haıen shákirtteri alǵashqy 11 kezdesýde nebári bir ret jeńiske jetti. Osyǵan baılanysty jankúıerler klýb basshylyǵyna narazylyq bildire bastady. Trıbýnada «Pace out» («Peıs, ket!») degen jazýy bar banner paıda bolyp, jankúıerler klýb basshysy Alan Peıstiń qyzmetinen ketýin talap etti.
Matchtan keıin jýrnalıster Haıennen qyzmetin jalǵastyrý múmkindigi týraly surady.
- Bilmeımin. Biraq bul týraly oılamaımyn. Óıtkeni mundaı oılar kóp kúsh-qýatty alady. Árıne, qazirgi jaǵdaıda bapkerdi qyzmetinen bosatý qalypty sheshim bolar edi. Alaıda men fýtbolshylarmen jumys isteýge bar nazarymdy aýdarǵym keledi. Al bul máseleni basqa adamdar sheshedi, – dedi Haıen.
Sondaı-aq maman «Výlverhemptonnan» jeńilý sebepterin túsindirdi.
- Biz burynǵydan da kóp jumys isteýimiz kerek. Ótkendi ózgerte almaımyz. Birinshi taımdy óte jaqsy ótkizdik, biraq keıin bárin óz qolymyzben qurtyp aldyq. 1:2 esebinen keıin oıyn barysyn ózgertý úshin kóbirek kúsh salýymyz qajet edi. Endi psıhologııalyq turǵydan qaıta daıyndalyp, alǵa jyljýymyz kerek. Bir kúni jaǵdaı mindetti túrde ózgeredi, – dedi bas bapker.
Aıta keteıik, Qazaqstan ulttyq quramasynyń shabýylshysy Dastan Sátpaev atalǵan kezdesýde 61-mınýtta ıAkob Brýýn Larsenniń ornyna alańǵa shyqty. Alaıda qazaqstandyq fýtbolshy komandasyn jeńilisten qutqara almady.
Osy nátıjeden keıin «Bernlı» 11 matchta segiz upaı jınap, Chempıonshıptiń týrnırlik kestesinde 21-orynda qaldy.
Aıta ketelik «Bernlı» bapkeri Dastan Sátpaevqa qatysty «Chelsıdiń» sheshimine narazylyq bildirdi.
