Men júgirgendi jaqsy kórmeımin - 80 jastaǵy marafonshy Saltanat Túıtebaev

ASTANA. KAZINFORM – Saltanat Túıtebaev Nıý-Iork marafonynda júldeger atandy. Ol bıylǵy dodada 42,2 shaqyrymdy 4 saǵat 45 mınýt 56 sekýndta júgirip ótip, 80-89 jas sanatynda birinshi orynǵa ıe boldy.

– Bul jolǵy marafon erekshe áser qaldyrdy. 59 myńnan asa adam qatar júgirdi. Sonyń ishinde áıelderdiń sany da az emes – 27 myń. Qyzdar qaýymyna aıtarym – júgirýmen aınalysyńyzdar, sporttan qalys qalmańyzdar. Men muny beker aıtyp otyrǵanym joq. Eýropa men Amerıka qyzdarynan qalyp qoımańyzdar, – dep ázilmen bastady áńgimesin marafonshy Jibek Joly telearnasynyń «Búgin LIVE» baǵdarlamasynda.

Zamanaýı tehnologııalarǵa beıim marafonshy zamandastaryn da jańashyldyqqa umtylýǵa shaqyrdy.

– Qazir til bilý de, aýdarý da qıyn emes. Osydan bes jyl buryn qyzdarym maǵan aýdarmashy qural syılaǵan. Qazir telefonnyń ózimen-aq kez kelgen tildi túsinýge bolady. Biz bala kúnimizde gadjet, televızor degendi bilmedik. Tún ortasyna deıin «qýma taıaq», «aqsúıek», «láńgi» oınap óstik. Bul da sporttyń bir túri. Sol ádet ómir boıy serik bolyp keledi, – deıdi marafonshy.

Saltanat aqsaqaldyń aıtýynsha, sport uzaq ómir men sergektiktiń kilti.

– Taza aýada jattyǵýdyń paıdasy zor. Aptasyna bes ret 21 shaqyrymnan júgirip turamyn. Boran, jańbyr, qar – men úshin kedergi emes. Eger aýa raıy tym qolaısyz bolsa, jattyǵýdy demalys kúnderine aýystyramyn. Shyny kerek, júgirgendi qatty jaqsy kóremin dep aıta almaımyn. Keıde ózimdi qamshylap shyǵamyn. Biraq márege jetken soń, kúni boıy sergek júremin, – deıdi Saltanat Túıtebaev.

Onyń aıtýynsha, sport oǵan tek kúsh-qýat emes, ómirlik tájirıbe de syılaǵan.

– Osy sporttyń arqasynda 24 memlekette boldym. Áıtpese men mıllıoner de, kásipker de emespin. Sport – meniń ómirlik serigim, – dep qorytyndylady ardager marafonshy.

Eske salsaq, «Astana–Kókshetaý–Astana» baǵytymen 600 shaqyrymdyq joldy júgirip ótken ýltramarafonshy tarıhı jetistikke qalaı jetkenin baıandap bergen edi.