Men jeńilgendi unatpaımyn – Ábıba Ábýjaqynova

ASTANA. KAZINFORM – Qazaqstandyq dzıýdoshy Ábıba Ábýjaqynova jyldy álemdik reıtıngtiń kósh basynda aıaqtady. 

– Byltyr ekinshi orynda aıaqtaǵan edim, bıyl sáti túsip, birinshi orynmen qorytyndylap turmyn. Barsha sportshylarǵa sony tileımin. Men úshin erekshe sát. Qazaq eli úshin de bul úlken qýanysh dep oılaımyn, – dedi dzıýdoshy Jibek Joly telearnasynyń Búgin LIVE baǵdarlamasynda.

Sonymen qatar Ábıba jyl boıyna jınaǵan 5096 upaı qalaı qalyptasqanyn túsindirdi.

– Bıyl tórt jarysqa qatystym. Sonyń birinde, Gran-prıde chempıon atansam, álem chempıonatynda kúmis júlde ıelendim. Al eki Grand slam týrnırinde qola medal alyp, barlyq jarystan júldeli oraldym. Osylaısha reıtıngtegi upaı sanyn arttyryp, jyldy birinshi orynmen aıaqtadym, – dedi ol.

Ábıba tatamıge qalaı shyǵatynyn da jasyrmady.

– Tatamıge ashýmen shyǵamyn. Ózimdi jeńilýge bolmaıdy dep jigerlendiremin. Jeńilgendi unatpaımyn. Men osy jerde lıdermin, men – myqtymyn, dep óz-ózimdi qaıraımyn, – dedi dzıýdoshy.

Eske sala keteıik, Qazaqstan dzıýdoshylary Grand Slam týrnırin bir júldemen aıaqtady. 

Sonymen qatar dzıýdodan jastar arasynda Qazaqstan birinshiligi máresine jetkenin jazǵanbyz.