«Men jastarǵa senemin»: SQO ákimi chellendjdi jalǵady

PETROPAVL. QazAqparat – Soltústik Qazaqstan oblysynyń ákimi Aıdarbek Saparov Maǵjan Jumabaevtyń 130 jyldyq mereıtoıyna oraı bastaý alǵan chellendjge qatysyp, aqynnyń óleńin oqydy, dep habarlaıdy QazAqparat tilshisi.

«Men jastarǵa senemin» chellendjine qoldaý bildirgen Aıdarbek Saparov Maǵjan Jumabaevtyń «Men kim» degen óleńin oqyǵan.

«Bıyl qazaqtyń uly aqyny, Alash qaıratkeri, jerlesimiz Maǵjan Jumabaevtyń týǵanyna 130 jyl tolady. Osyǵan oraı, Maǵjan Jumabaev aýdanynyń oqýshysy Jasmın Qaldybek «Men jastarǵa senemin» chellendjin bastady. Bul jaqsy bastamany elimizdiń belgili azamattary qoldap, Maǵjannyń óleńderin oqyp jatyr. Men Jarasbaı Súleımenovten estafetany qabyl alyp, Maǵjan Jumabaevtyń «Men kim» óleńin oqydym. Bul chellendjdi Parlament Senaty tóraǵasynyń orynbasary Olga Perepechınaǵa jáne SQO aýdandarynyń ákimderine joldaımyn», - dep jazdy Aıdarbek Saparov.

Atalǵan chellendjdi eki apta buryn aqıyq aqyn Maǵjannyń qurmetine Sarytomar aýylynyń 12 jastaǵy turǵyny Jasmın Qaldybek bastaǵan edi.

Oqýshy qyz estafetany jalǵastyrýdy Erlan Qoshanovqa usyndy. Memlekettik qaıratker bastamany qoldap, usynysty qabyl aldy.

Esterińizge salaıyq, bıyl Soltústik Qazaqstanda 2023 jyl – Maǵjan jyly dep jarııalanǵan edi. Aqynnyń mereıtoıyna oraı óńirde saltanatty is-sharalar ótip jatyr. Jaqynda «Men ólmeımin, meniki de ólmeıdi...» atty respýblıkalyq jazba aqyndar músháırasy ótip, toǵyz jeńimpazǵa Maǵjan Jumabaev atyndaǵy tuńǵysh ádebı syılyq tabystaldy.